Almatylyq sportshylar qysqy spartakıadada top jardy
ALMATY. QazAqparat - Almaty quramasy qysqy spartakıadada jeńiske jetti, dep habarlaıdy QazAqparat tilshisi.
Qarashanyń 11-i men jeltoqsannyń 28-i aralyǵynda ótken IV qysqy respýblıkalyq spartakıada máresine jetti. Spartakıadanyń ashylý saltanaty Astanadaǵy «Qazaqstan» sport kesheninde ótken bolatyn. Spartakıada tórt jylda bir uıymdastyrylady. Bıylǵy jarys qysqy sporttyń 17 túrinen uıymdastyryldy, onyń 7-eýi Almatyda ótti. Olar - short-trek, kerlıng, qyzdar arasyndaǵy shaıbaly hokkeı, frıstaıl (skı-kross), shańǵy qossaıysy, shańǵymen tuǵyrdan sekirý, taý shańǵy sporty.
Almaty qalasynyń Aqparattyq sport haby spartakıadanyń qorytyndysyn jarııa etti.
«Almaty quramasynyń sportshylary jalpy komandalyq esepte 571 upaı jınap, jeńiske jetse, Shyǵys Qazaqstan oblysynyń komandasy 558 upaımen ekinshi orynǵa jaıǵasty. Al úzdik úshtikti 388 upaımen astanalyqtar túıindedi», delingen hab taratqan málimette.
Aıta keter jaıt, bul spartakıada Qazaqstannyń 14 komandasynyń qatysýymen elimizdiń alty qalasy jáne oblystarynda ótkizilgen bolatyn.
Jeńimpazdar uldar arasyndaǵy shaıbaly hokkeı jáne konkımen júgirý sportynan - Astanada, mánerlep syrǵanaýdan - Shymkentte, bıatlon jáne shańǵy jarysynan - Almaty oblysynda, frıstaıl mogýl men akrobatıka, sonymen qosa snoýbord jáne shańǵymen baǵdarlanýdan ShQO, dopty hokkeıden Oral qalasynda kýbok, medal jáne gramotalarmen marapattalǵan edi.
Esterińizge sala ketsek, budan burynǵy 3-shi spartakıadada Shyǵys Qazaqstan oblysynyń sportshylary jeńimpaz atanǵan bolatyn. Osy joly olar almatylyqtardan tek 13 upaı ǵana utylyp, ekinshi oryndy qanaǵat tutty.
