Almatylyq sportshy ózin half-ironman deńgeıinde synamaq
Sportshy «7 kúnde 7 is» qaıyrymdylyq sharasyn 20 tamyzda bastaǵan. Ol turmysy tómen otbasylardaǵy erekshe balalarǵa el nazary aýsa, olardyń kómegimen búldirshinderdi mektepke daıarlaýǵa járdemdessem degendi maqsat tutqan.
«Bul ıdeıa maǵan halyqaralyq tájirıbeden keldi. Shet elderde sportshylar qaıyrymdylyq sharasyn nasıhattaýda asa uzaq araqashyqtyqta synnan ótedi. Múmkindigi shekteýli balalarǵa sabaqta, úılerinde jaılylyq jasalǵanyn qalaımyn. Ironman jartylaı formatynda apta boıy 7 ret (1,9 shaqyrym júzý, 90 km velojúris, 21,1 km júgirý) trıatlon dıstantsııasyn oryndaýym kerek. Bul sport baǵdarlamasyn kúnniń birinshi aýysymynda bitirýge tyrysamyn. Balalardy mektepke daıarlaýǵa kómektessem degen tilegim jerde qalmasyna senemin», - dedi Sergeı Levadnıı.
Asa aýyr synaqty oryndaý arqyly Sergeı adamdardyń nazaryn qoǵamdyq máselege aýdarǵysy keledi. Týmysynan erekshe balalar, daýn sındromy, aýtızmmen aýyratyn, estý qabiletinen aıyrylǵan balalardyń ata-anasyna jańa oqý jyly qarsańynda demeý kórsetýdi kózdeıdi.
«Sergeı óziniń ıdeıasyn usyndy. Biz naýqas balalardyń tizimin jasadyq. Árıne erekshe qajettiligi bar balalardyń ata-analarynyń jaǵdaıy máz emes. Olar járdemaqymen ǵana kún kórip keledi. Sebebi balaǵa kútim jasaý úshin jumysyn tastap, úıde otyrady. Qaıyrymdylyq sharasyn uıymdastyrýshylarǵa naqty qandaı quraldar keregin jetkizdik», - dedi «Special Olympics» qoǵamdyq birlestiginiń dırektory Galına Ilına.
Sh.Esenov atyndaǵy qordyń Komanda SOS eriktiler kordınatsııalyq ortalyǵy Sergeıdi sporttyq jabdyqpen qamtamasyz etip, uıymdastyrý sharasyna qoldaý bildirgen. Al qaıyrymdylyq aktsııasyna baqylaý jasaýdy Almatylyq trıatlon federatsııasy mindetine alǵan.
«Ironman jartylaı formatynda 7 kún ishinde 7 araqashyqtyqty oryndaý ońaı sharýa emes. Kez-kelgen sportshy mundaı táýekelge bara almas. Biraq Sergeı myqty trıatlet. Ony jaqsy bilemin. Onyń qolynan bul is keledi», - dedi belgili qazaqstandyq Ironman, trıatlonshy ári jattyqtyrýshy Maksım Mazýr.
Qaıyrymdylyq aktsııasynyń birinshi kúni, 20 tamyzdan bastap mektepke qajetti quraldar (sómke, dápter, qalam, qaryndash t.b) jınalýda. Jylý jınaý ortalyǵy retinde Almatydaǵy iri jattyqtyrý klýby belgilengen. Kez-kelgen janashyrlyq tanytamyn deýshi Komanda SOS qyzmetkerlerimen +7 727 346 92 88 nómiri arqyly baılanysa alady. Mektep quraldaryn jınaý aktsııasy 28 tamyz kúni aıaqtalady.
Sergeı Levadnııdiń sporttaǵy saýapty qadamyn eki jyl buryn bastaǵan. Qaıyrymdylyqqa baǵyttalǵan ýltratıatlon esebinen sportshy turmysy tómen otbasynan shyqqan 48 oqýshyny oqý qural-jabdyqtarymen qamtamasyz etken.