Almatylyq sheneýnikter Shpekbaevtyń synynan nátıje shyǵardy

QR Memlekettik qyzmet isteri jáne sybaılas jemqorlyqqa qarsy kúres agenttigi tóraǵasynyń orynbasary Alık Shpekbaev osydan 1,5 aı buryn Alataý aýdandyq memlekettik kirister basqarmasynyń ortalyǵynda bolǵan edi.

Jumys sapary barysynda ol mekemeniń jumysyn adamǵa kórsetilgen qurmetsizdik dep baǵalaǵan edi.

Qalalyq memlekettik kirister departamenti 1,5 aıdyń ishinde eskertýlerdiń bárin qaperge alyp, aýdandyq basqarmanyń ortalyǵyn qaıta jańǵyrtýdan ótkizdi.

Memlekettik organdar 1,5 aıdyń ishinde azamattarǵa qyzmet kórsetýdiń jańa alańyn jasady.

Ǵımaratty kúrdeli jóneýden ótkizýge 11 mln teńge jumsaldy.

«Buryn keńsede kedergi kóp bolatyn. Áınek qabyrǵalar ornatylǵan. Adamdar kezek kútip turatyn. Únemi daý-janjal bolatyn. Ǵımarat jóndeýdi talap etetin. Qazir bári basqasha, elektrondy kezek ornatyldy. Múmkindigi shekteýli jandarǵa jaǵdaı jasaldy, pandýstar, dabyl tetikteri ornatyldy. Qazir azamattar tarapynan jaqsy pikir aıtylyp jatyr», - dedi qalalyq MKD basshysynyń orynbasary Qanat Baltabekov.

Kún saıyn memlekettik kirister basqarmalarynyń ortalyqtarynda 7-10 myń jeke jáne zańdy tulǵaǵa memlekettik qyzmet kórsetiledi.

Jalpy alǵanda Almatyda Naýryzbaı, Medeý, Almaly, Alataý aýdandyq basqarmalarynyń ortalyǵy kedergisiz qaǵıdamen jumys istep keledi.

Bıyl jeltoqsan aıynda Jetisý aýdanynyń ortalyǵy atalǵan formatqa kóshedi.

Qazir onda qurylys jumystary júrip jatyr.

Aıta ketý kerek, osydan birneshe aı buryn QR Memlekettik qyzmet isteri jáne sybaılas jemqorlyqqa qarsy kúres agenttigi tóraǵasynyń orynbasary Alık Shpekbaev Astanada ótken baspasóz máslıhatynda Almatydaǵy Alataý aýdandyq basqarmasynyń jumysyn synaǵan bolatyn.

Onyń aıtýynsha, bul - azamattarǵa degen qurmetsizdik.

A.Shpekbaev ortalyqty qaıta jańǵyrtýǵa 1 aı ýaqyt bergen bolatyn.