Almatylyq polıtsııa qyzmetkerlerine 159 jańa avtokólik berildi
ALMATY. 16 mamyr. QazAqparat /Erbol Azanbek/ - Keshe Almaty qalasynyń ákimi Ahmetjan Esimov qalalyq ІІD qyzmetkerlerine 159 jańa avtokóliktiń kiltin tabys etti.
Mitsubishi Lancer, Daewoo Nexia, SsangYong Kyron, GAZel avtokólikteri jol polıtsııasy, patrýldik jáne ІІD-niń kezekshi bólimderi jumysyna paıdalanylady. Qala ákimi shara barysynda Elbasynyń Almatyny damytý týraly tapsyrmasynyń ishindegi negizgi baǵyttyń biri - qylmyspen kúres ekendigin atap ótti. «Memleket basshysy QR ІІM men Almaty qalasy ІІD-ine qylmyspen kúresti damytý, qylmystyń aldyn alý, sondaı-aq bizdiń qalanyń qaýipsiz bolýyn qamtamasyz etýdi tapsyrdy. Qaýipsiz qala - bul ekonomıkanyń damýy, tabystyń jáne turǵyndardyń ómir súrý deńgeıiniń artýy. Bul óte úlken ári mańyzdy tapsyrma. Biz barlyq kúshimizben qalada qaýipsizdikti qamtamasyz etip, Elbasynyń tapsyrmasyn júzege asyrýymyz kerek», - dedi A.Esimov.
Ol sondaı-aq jyl saıyn ІІD-ine bólinetin qarjynyń ulǵaıyp kele jatqandyǵyn jetkizdi. 2007 jylmen salystyrǵanda bıyl bólingen qarjy 80 paıyzǵa ulǵaıyp, 8,7 mlrd. teńgeni quraǵan. Ótken jylmen salystyrǵanda 26 paıyzǵa ósken. «Endi sizderdiń maqsattaryńyz qaýipsizdikti qamtamasyz etý. Kúndiz-túni jumys istep, osy qıyn da, mańyzdy tapsyrmany júzege asyrý», - dedi qala ákimi avtokólik kiltterin tapsyryp turyp.
