Almatylyq polıtsııa qyzmetkerleri Naýryz merekesine oraı kúsheıtilgen tártipke kóshti
ALMATY. 20 naýryz. QazAqparat - Naýryz merekesi qarsańynda Almaty qalasynda qaýipsizdik sharalary kúsheıtildi. Naýryzdyń 19-ynan bastap almatylyq polıtseıler kúsheıtilgen tártipte jumys atqarýda.
Qalada tártipti qadaǵalaýǵa baǵyttalǵan jedel aldyn-alý sharalary bastaldy.
25 naýryzǵa deıin qoǵamdyq tártipti 2 myńnan asa ishki ister qyzmetkeri qadaǵalaıtyn bolady. Naýryz merekesi qarsańynda qalada qylmysty boldyrmaý jáne onyń aldyn alýǵa baǵyttalǵan sharalarǵa, sondaı-aq, 300 avtokólik, ІІD qyzmetkerleriniń barlyq quramy, ishki ásker bóliminen 720 sarbaz jumyldyrylǵan. Qazirgi ýaqytta patrýldik qyzmettiń baǵyttary bekitilgen.
«Qalaǵa kire beris beketterinde avtokólikterdiń esirtki tasymaldaý nemese jarylǵysh zattardy ótkizbes úshin arnaıy qadaǵalaý jumystary júrgizilip jatyr. Qala boıynsha jeti post qoıyldy. Saýda oryndarynda, qara bazarlar men vokzaldarda jedel-izdeý sharalary uıymdastyrylýda. Erekshe nazar kóshe qylmystaryna, jol qaýipsizdigi men balalardyń qaýipsizdikterine aýdarylatyn bolady. Mereke kúnderi sharalar ótetin oryndar da erekshe nazarǵa alynyp, kúzetter qoıylady», - dedi Almaty qalasynyń ІІD Qoǵamdyq qaýipsizdik basqarmasynyń bastyǵy, polıtsııa podpolkovnıgi Serik Kenenbaev.
