Almatylyq polıtseıler Úlken Almaty kóli mańynda joǵalǵan sheteldikti qutqardy
ALMATY. QazAqparat – Almaty taýlarynda polıtseıler Úlken Almaty kóline serýendeýge shyqqan sheteldikti qutqaryp qaldy, dep habarlaıdy QazAqparat tilshisi.
«17 qańtar kúni Almaty qalasnyń Polıtsııa departamentiniń Jedel basqarma ortalyǵyna 45 jastaǵy túrik azamatynyń óz kóligimen Úlken Almaty kóline mańyna ketip, baılanysqa shyqpaǵany týraly habar kelip túsken. Birden joǵalǵan azamatty tabý úshin izdeý sharalary uıymdastyryldy. Іzdeýge PD-nyń jeke quramy baǵyttaldy. Іzdeý sharalary barysynda «Toıota Raf-4» markaly avtokólik Úlken Almaty kóli aldyndaǵy jol jıeginen tabyldy», - dep atap ótti polıtsııada.
Kóliktiń ishinen eshkim tabylmaǵan. Polıtseıler izdeýdi odan ári jalǵastyrǵan. Nátıjesinde búgin, 18 qańtarda saǵat 11:00 shamasynda Almaty qalalyq Polıtsııa departamentiniń krımınaldyq polıtsııa basqarmasynyń qyzmetkerleri avtokólikten úsh shaqyrym jerden úsik shalǵan azamatty tiri kúıinde taýyp alǵan.
«Polıtseılerdiń jedel áreketiniń nátıjesinde qaıǵyly oqıǵanyń aldyn aldyq. Er adamdy jedel járdemniń dárigerlerine tapsyrdyq. Serýendep júrgen kezinde onyń qarǵa batyp, shyǵa almaı qalǵany anyqtaldy. Sheteldik azamat óz betimen shyǵýǵa áreket jasaǵan: butaqtar tósegen, kólik dóńgeleginiń astyn qazǵan, biraq bul kómektespegen. Avtokólikten shyǵyp, ol kómek izdeýge ketip, adasyp qalǵan», - dep habarlady polıtsııada.
