Almatylyq polıtseıler aǵashtan sekirmek bolǵan mas adamdy qutqardy
ALMATY. QazAqparat - Almatyda aǵashtan sekirip ólmek bolǵan mas adam qutqaryldy, dep habarlaıdy QazAqparat tilshisi.
Onyń vıdeosy áleýmettik jelide tarady.
Almaty qalalyq Polıtsııa departamentiniń málimetinshe, 3 maýsymda Áýezov aýdandyq polıtsııa basqarmasynyń kezekshi bólimine belgisiz er adam alkogoldik mas kúıinde 3-yqsham aýdannyń №20 úıdiń janynda júrgeni týraly qońyraý kelip tústi.
«Oqıǵa ornyna barǵan ýchaskelik ınspektorlar aqparatty rastady. Shyndyǵynda, er adam júrgen joq, ol aǵashtyń tóbesinde otyrdy. Onyń jeke basy birden anyqtaldy – 1972 jyly týǵan B. esimdi azamat. Mas adam birneshe ret sekirýge umtyldy. Ótip bara jatqan adamdar ony, mundaı áreket jasamaýǵa kóndirýge tyrysqan kezde ýchaskelik ınspektor Ádilet Shegebaev formasyn sheship, aǵashqa órmelep shyǵyp, óz-ózine qol jumsaýǵa tyrysqan adamdy tómen túsirdi», – dedi Áýezov aýdandyq polıtsııa basqarmasynyń bastyǵy Ulan Ábilhaıyr.
Eshkim zardap shekken joq.
Polıtsııa er adamdy sot-narkologııalyq saraptamaǵa ertip bardy, onda onyń mas bolý faktisi resmı túrde rastaldy.
Sodan keıin quqyq buzýshy polıtsııaǵa jetkizildi, ol jerde onyń osy áreketiniń sebebi belgili bolady.
