Almatylyq polıtseı órtten qarııany qutqaryp úlgerdi, eki adam mert boldy
ALMATY. QazAqparat – Almatyda polıtsııa qyzmetkeri janyp jatqan úıden zeınetkerdi alyp shyqty, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, búgin túngi úshter shamasynda Lazarev kóshesindegi jeke úıden órt shyqty. Qyzyl jalyn úıdiń aýlasynda turǵan kólikti de sharpydy. Úıdiń ishinde adamdar bolǵan.
«Bizdi polıtsııa qyzmetkeri qaqpany qaǵyp oıatty. Ornymyzdan atyp turyp, polıtseımen birge kórshilerdi oıatýǵa kiristik. Tártip saqshysy janyp jatqan úıdiń terezesin syndyryp, ishinen er adamdy alyp shyqty», – deıdi oqıǵa kýágeri.
Polıtseıdiń aıtýynsha, ol sol ýaqytta aýdandyq ishki ister basqarmasyna bara jatqan.
«Men Lazarev kóshesimen kele jatyp, №79 úıdiń shatyrynyń astynan jalyn shyǵyp jatqanyn kórdim. Aldymen, jaqyn mańdaǵy úılerdiń turǵyndaryn oıatyp, olardy toptastyryp, qaýipsiz jerde qalýlaryn suradym. Kórshisiniń aýlasy arqyly janyp jatqan úıdiń aýlasyna kirdim. Úıdiń terezesin syndyryp, sol tereze arqyly qarııany shyǵaryp aldym. Keıin ony jedel járdem qyzmetkerlerine tapsyrdym. Órt tolyq oqshaýlanǵanǵa deıin ózim sol jerde boldym», – dedi Áýezov aýdandyq polıtsııa basqarmasynyń ýchaskelik ınspektory Bektemir Qaýynbaev.
Órt kezinde, úıde 71 jastaǵy er adam, onyń 33 jastaǵy ógeı balasy jáne 15 jastaǵy nemeresi bolǵandyǵy anyqtaldy. Ókinishke oraı, jasóspirim men onyń aǵasy mert boldy. Zeınetkerdiń ómirine qaýip tónip turǵan joq.
