Almatylyq ortohırýrgter kúrdeli ota jasady
ALMATY. QazAqparat- Almatylyq ortohırýrgter alǵash ret synǵan oń jaq ıyq súıeginiń basy men býynyna operatsııa jasady, dep habarlaıdy QazAqparat tilshisi.
Almaty qalasynyń №7 qalalyq klınıkalyq aýrýhanasy baspasóz qyzmetiniń málimetinshe, qabyldaý bólimine jaraqat alǵan 71 jastaǵy naýqas shuǵyl túrde jetkizildi. Oǵan oń jaq ıyq súıeginiń basy tórt jerden syndy degen dıagnoz qoıyldy.
«Naýqas birden ortohırýrgııa bólimine jatqyzyldy. Onyń ıyq súıeginiń basy synyp, úgitilip ketken. Ony qalpyna keltirý múmkin emes edi. Tolyq tekseristen keıin naýqastyń ıyǵyn endoprotezdeý boıynsha operatsııa jasaldy, oǵan Frantsııada shyǵarylǵan Unik(Evolutis) protez qoldanyldy», - dep habarlady aýrýhanadan.
Buǵan deıin frantsııalyq dárigerler operatsııanyń mundaı túri boıynsha ortohırýrgter arasynda sheberlik saǵatyn ótkizgen. 2020 jyly Frantsııa, Reseı jáne qazaqstandyq dárigerler birlesip, endoprotezdeý boıynsha birneshe ota jasady. Osy joly jergilikti mamandar atalǵan operatsııany alǵash ret ózderi jasady. Ota sátti ótti.
«Dárigerlerge emdeý tásilin tańdaý qıynǵa soqty. Biz alǵashqy endoprotezdeý ádisin tańdadyq. Operatsııa oıdaǵydaı ótti. Besinshi kúni naýqastyń jaǵdaıy jaqsardy. Qolyn erkin qımyldata alady. Qazirgi ýaqytta alǵashqy ońaltý jumysy júrgizilip jatyr», - dedi ortohırýrgııa bóliminiń meńgerýshisi Arnat Baızaqov.
Óz kezeginde, naýqas barlyq medıtsına qyzmetkerlerine alǵys bildirdi.
«Sońǵy 3 kún jaqsy uıyqtap júrmin. Qolymdy qoryqpaı erkin qozǵaı bastadym. Búgin oń jaq qolymmen tamaq ishýge talpyndym. Buryn tósekten turýymnyń ózi muń edi. Men dál osy №7 aýrýhananyń ortohırýrgııa bólimine túskenime qýanamyn. Áıtpese, men múgedek bolyp qalar edim», - deıdi naýqas.
Dárigerlerdiń aıtýynsha, mundaı operatsııa shetelde qomaqty qarajatqa jasalady. Máselen Frantsııa men Germanııada – 18 myń eýrodan joǵary. Al, Almatyda tegin medıtsınalyq kómektiń kepildendirilgen kólemi men MÁMS aıasynda jasalady.
