Almatylyq órt sóndirýshiniń otbasynda úshem dúnıege keldi
Bul – Almaty qalasy TJD Órtke qarsy qyzmet garnızony úshin qýanyshty jaǵdaı. Áriptesine qoldaý kórsetý úshin sábılerdi shyǵaryp alý rásimine №1 mamandandyrylǵan órt sóndirý bólimi ekinshi qaraýylynyń jeke quramy jáne órt sóndirý qyzmeti basqarmasynyń basshylyǵy bardy.
Jas áke atanǵan 26 jastaǵy Dáýenov Elaman Qambaruly memlekettik órtke qarsy qyzmette 7 jyl qyzmet etip keledi. Elaman 2022 jyldyń 5 qańtarynda Abaı kóshesi, 34 mekenjaıynda otqa oranǵan kópqabatty úıdegi qutqarý jumystaryna jáne órtti sóndirýge qatysqan bolatyn. Sol kezde №1 mamandandyrylǵan órt sóndirý bóliminiń qaraýyl bastyǵy Arman Sádýaqastyń basshylyǵymen órt sóndirýshiler búlikshilerdiń shabýylyna tap boldy. Aldyna qoıylǵan maqsatynnan qaıtpaı, keıin sheginbeı, olar azamattyq kıim kıip, órtenip jatqan úıge kirip, turǵyndardy joǵarǵy qabattardan evakýatsııalap, órtti sóndirdi. Nátıjesinde 1939 jyly týǵan áıeldi qutqaryp, aýrýhanaǵa aman-esen jetkizip, dárigerlerge tabystady. Sonymen qatar, búlikshilerden eki qyz-kelinshekti aman alyp qalyp, olardy №1 mamandandyrylǵan órt sóndirý bólimindegi qaýipsiz jerge ornalastyrdy.
Elaman Dáýenov qańtar oqıǵalaryndaǵy qyzmet barysynda kórsetken qaısarlyǵy, eldegi tótenshe jaǵdaı kezinde azamattardyń múlkin qorǵap, turǵyndarǵa kórsetken qamqorlyǵy úshin Almaty qalasy ákiminiń jáne qalalyq kásipkerler palatasynyń alǵys hattarymen marapattaldy.
«Men úshemniń ákesi bolatynymdy bilgende, qatty tolqydym. Áıelim ekeýmiz mundaı jaǵdaı bolýy múmkin dep oılamadyq. Árıne, qazirgi ýaqytta alańdaýshylyq sezim bar. Keıbireýler bir jańa týǵan nárestemen ne isterin bilmeı jatady, al bizde birden úsh sábı dúnıege keldi», - deıdi jas áke.
TJD basshylyǵy qoldaý kórsetip, otbasyna QR zańnamasyna sáıkes tıisti materıaldyq kómek berildi.
Aıta ketsek, Almaty qalasy TJD baspasóz qyzmetiniń málimetterine sáıkes, ótken 2022 jyly Almaty qalasy TJD Órt sóndirý jáne avarııalyq qutqarý jumystary qyzmeti 3 myńǵa jýyq jedel shyǵýdy júzege asyryp, 600-den astam adamdy evakýatsııalady. 154 adam, onyń ishinde 24 bala qutqaryldy.
Foto: TJM saıty
