Almatylyq órt sóndirýshilerge arnaıy kólik kiltteri tapsyryldy
ALMATY. QazAqparat - Almatyda órt sóndirý bólimshelerine memlekettik bıýdjetten arnaıy tehnıkanyń kiltteri tabystaldy, dep habarlaıdy QazAqparat tilshisi.
Qalalyq TJD garnızonynyń materıaldy-tehnıkalyq bazasy AL-32 avtobaspaldaǵymen, 8 avtokólikpen, 4 avtotsısternamen tolyqty.
Alataý aýdanyndaǵy №15 órt sóndirý bólimin aralaý kezinde qala ákimine jańa tehnıkalardyń múmkindigi jaıly baıan etildi.
«Almaty qalasynda qaýipsizdikti qamtamasyz etý qalanyń 2020 jylǵa deıingi damý baǵdarlamasynyń basym baǵyttarynyń biri. Atap aıtqanda, materıaldyq tehnıkalyq qamtamasyz etý máselesi, jyljymaly quramdy jańartý, aldyńǵy qatarly tehnologııany engizý men damytý óte ózekti. Alaıda, Departamenttiń eń basty qundylyǵy onyń jeke quramy bolyp qala beredi. Sizderdiń jumystaryńyz óte jaýapty, mańyzdy, ómirlerińizge qaýip tónip tursa da Almaty azamattarynyń ómirin qaýipsiz etýge bar kúshterińizdi salyp kelesizder», - dedi ákim Baýyrjan Baıbek.
TJD basshysy Serik Áýbákirovtiń aıtýynsha, almatylyq órt sóndirýshiler Qazaqstanda tuńǵysh ret arnaıy mototsıklderge otyrdy.
7 aı ishinde 69 órt sóndirildi. Onyń 9-yn avtokólik arqyly sóndirý múmkin bolsa, mototsıklıster 2 adamnyń ómirin arashalap qaldy.
Serik Áýbákirov Almatydaǵy sel qaýipti ańǵarlarda 2 plotına turǵyzylyp, 1 jańartylatynyn habarlady.
Sonymen qatar, Qarǵaly ózeniniń arnasy turaqtandy.
Odan bólek selge qarsy avtomattandyrylǵan baqylaý júıesi iske qosylmaq.
Sel júrý qaýpi bar 9 kólde sý aıdaıtyn arnaıy sorǵyshtar ornatylǵan.
«Osy ınjenerlik sheshimderdiń arqasynda №6 kólde sý kólemin 310 myń tekshe metrden 140 myń tekshe metrge deıin azaıtý múmkin boldy. Munda qaýip tolyǵymen seıildi. Sebebi, júrgizilgen kanal arqyly kól tranzıtti sý qoımasyna aınaldy. Osyndaı jumystar 13 BIS kólinde de jasaldy. Onda da 182 myń tekshe metr sý kólemi 38 myń tekshe metrge tústi», - dedi Serik Áýbákirov.
Sonymen qatar, kelesi jyly Naýryzbaı jáne Bostandyq aýdandarynda jańa órt sóndirý bólimsheleri ashylatyny belgili boldy.
