Almatylyq órt sóndirýshiler bir táýlikte 8 órt oshaǵyn joıdy
ALMATY. QazAqparat – Almatynyń Alataý, Bostandyq, Naýryzbaı, Túrksib aýdandarynda qýraǵan shóp órtendi, dep habarlaıdy QazAqparat tilshisi.
Qalalyq tótenshe jaǵdaılar departamentiniń málimetinshe, 23 naýryzda órt sóndirýshiler 8 órt oshaǵyna shyqty. Alataý, Bostandyq, Naýryzbaı, Túrksib aýdandarynada qurǵaq shóp tutanǵan.
23 naýryz saǵat 16:20-dan bastap TJD kúshteri men quraldary Bostandyq aýdanyndaǵy «Ermensaı» yqsham aýdanynyń Baqtygereev kóshesinde órtti sóndirýdiń joǵary dárejesi boıynsha jumys istedi.
«Órt sóndirý brıgadasy barǵan kezde taý bókterinde jalpy aýmaǵy 2 ga jerdi qamtyǵan qurǵaq shóptiń janýyn anyqtady. Jel turǵandyqtan, órttiń betkeılerdegi turǵyn úılerge qaraı taralý qaýpi týyndady. Órt avtotehnıkasy taýǵa shyǵa almaǵandyqtan, qyzyl jalyndy qarapaıym quralmen jáne aspaly órt sóndirgishpen aýyzdyqtaýǵa týra keldi. Órt 18:31-de tolyq joıyldy. Qabyldanǵan sharalardyń arqasynda órtten úıler men alma baǵyn qorǵaýǵa qol jetkizildi», - dep dep málim etti departamentten.
Órtti sóndirýge jeke quramnan 24 maman jáne 5 tehnıka jumyldyryldy.
«Órt qaýipti kezeńniń bastalýyna baılanysty qala turǵyndary men qonaqtaryn ashyq otty paıdalanýdan, ot jaǵýdan, temeki shegýden jáne qurǵaq shóp pen orylǵan shópti órteýden bas tartýdy suraımyz. Kináli adamdar ákimshilik, al aýyr zardaptar týyndaǵan jaǵdaıda qylmystyq jaýapkershilikke tartylady», - dep eske saldy vedomstvo ókilderi.
