Almatylyq onkolog: Qaterli isik - úkim emes
ALMATY. QazAqparat - 4 aqpan - Dúnıejúzilik qaterli isikke qarsy kúres kúni. Osyǵan oraı, Almaty qalasynyń onkologtary erler men áıelderdi isik aýrýynyń belgileri áli baıqalmaǵan erte kezeńde dıagnozdaýǵa múmkindik beretin skrınıngtik tekserýden ótýge shaqyrdy, dep habarlaıdy QazAqparat tilshisi.
Almaty onkologııalyq ortalyǵynyń skrınıng bóliminiń meńgerýshisi Sulý Sadyqovanyń aıtýynsha, qaterli isik - ol úkim emes.
«Erte kezeńde anyqtalǵan isik tolyǵymen emdeledi. Aýrýdyń belgileri paıda bolǵan jáne isiktiń taralý múmkindigi bolǵan keıingi kezeńderde aýrýdy emdeý kúrdelene túsedi. Sońǵy 3 jylda júrgizilgen skrınıngtik tekserýlerdiń nátıjesinde 200-den astam sút bezi, 40-qa jýyq jatyr moıny obyry jáne 50-den astam tik ishek pen toq ishek isigi anyqtaldy», - deıdi dáriger.
Mamannyń aıtýynsha, tıimdi ekeni dáleldengen qaterli isik skrınınginiń ádisteri mynadaı: 40-70 jastaǵy áıelderde sút bezi obyrynyń mammografııalyq skrınıngi, 2 jylda 1 ret; 30-70 jas aralyǵyndaǵy áıelderde 4 jylda bir ret isik aldy jáne jatyr moıny obyryna tsıtologııalyq skrınıng júrgizý; Jasyryn qan analızi, kolonoskopııaǵa test arqyly toq ishek pen tik ishektiń qaterli isigine jáne isik aldy aýrýlaryna skrınıng, 50-70 jasta, 2 jylda bir ret. Skrınıngten tirkelgen jerdegi emhanadan ótýge bolady.
Almaty onkologııalyq ortalyǵynan habarlaǵandaı, Almatyda jyl saıyn 30-70 jas aralyǵyndaǵy 100 myńnan astam áıel sút bezi men jatyr moıny obyryna, al 40-70 jas aralyǵyndaǵy 100 myńnan astam erler men áıelder toq ishek pen tik ishek obyryna skrınıngtik tekserýden ótedi.
2021 jyly Almaty qalasynda qaterli dertke shaldyqqan 4482 naýqas anyqtaldy. Oyń 34,4 paıyzy bastapqy kezeńde bolýy, naýqastardyń qaterli isikten tolyq aıyǵýyna múmkindik beredi.
