Almatylyq ónerpazdar Astana kúnine frantsýz ánderin shyrqady
Almatyda Astana kúnin toılaý Arbat alańynan bastaldy. Elordanyń 20 jyldyq mereıtoıyna arnap «Almaty-Astana: Mádenı kópir» fotokórmesi uıymdastyryldy. Jas sýretshiler Astana men Almatynyń rýhanı baılanysyn sheber beınelegen.
«Fotokórme álemdik mádenı ortalyqtardaǵy ınnovatsııaǵa umtylys pen yntymaqtastyqty kórsetip, jas memleket tájirıbesiniń urpaqqa úlgi bolatyndyǵyn dáleldeıdi. Osy kórme elimizdiń eki bas qalasy tyǵyz baılanysta damyp, bir-birin úılesimdi tolyqtyratynyn kórsetedi», - dedi uıymdastyrýshylar.
Alataý dástúrli óner teatrynyń ónerpazdary án men jyrdan shashý shashty. Arbat alańynan álem halqynyń júreginen oryn tapqan Edıt Pıaftyń ánderi dástúrli aspaptyń sarynymen shalqydy.
«Qazaq memleketi men Frantsııanyń dostyq qarym-qatynasy áldeqashan ornyqqan. Mádenı baılanysy odan ári nyǵaıyp keledi. Sonyń bir dáleli - Sorbonna-Qazaqstan ınstıtýty. Alataý dástúrli óner teatry eki eldiń dostyǵyn halyqqa jetkizgisi keldi. Teatrymyzdyń talantty jastardan turatyn etnofolklorlyq ansambli dástúrli ónerdi zamanǵa saı óńdep, oryndaıdy. Búgin Edıt Pıaftyń «Non, je ne regrette rien», frantsýz áni «Derniere Danse» jandy daýysta, orkestrdiń súıemeldeýimen oryndalady»,-dedi teatrdyń baspasóz hatshysy Gúlmıra Qajıeva.
