Almatylyq oqýshylar úshinshi toqsanda qalaı oqıdy

ALMATY. QazAqparat – Almaty qalasy sanıtarlyq-epıdemıologııalyq baqylaý departamentiniń bastyǵy, qalanyń bas memlekettik sanıtar dárigeri Jandarbek Bekshın onlaın brıfıng barysynda oqýshylarǵa qandaı jaǵdaıda mektepke oralýǵa ruqsat beriletinin aıtty, dep habarlaıdy QazAqparat tilshisi.

«Bul jańa jyldyq demalystan keıingi epıdemıologııalyq jaǵdaıǵa baılanysty bolady. Eger biz tumaýdy negizge alsaq, ádette jańa jyldyq merekede barlyǵy shetelge, kýrorttarǵa jáne taǵy basqa jerlerge baryp JRVI men tumaýdyń nebir shtamdaryn ákeletin. Qazir bul shekteýli. Alaıda balalarymyz demalys kezinde barlyq qaýipsizdik sharalaryn saqtaýy kerek. Ata-analar da muqııat bolýy kerek. Qazirgi kezde balalar úshin eń qaýiptisi - kompıýterlik klýbtar. Tekserý kórsetkendeı, zańsyz, jasyryn jumys istep jatqan kompıýterlik klýbtar barshylyq. Biz qazir olardy jaýyp, ákimshilik jaza qoldananyp jatyrmyz», - dedi Jandarbek Bekshın onlaın brıfıng barysynda.

Buǵan deıin Jandarbek Bekshın qaladaǵy koronavırýsqa qatysty jaǵdaıdyń áli de kúrdeli ekenin aıtqan bolatyn.

Aıta keteıik, Almatyda QR Premer-Mınıstriniń orynbasary Eraly Toǵjanovtyń tapsyrmasyna sáıkes jańa karantın shekteýleri engiziledi.