Almatylyq oqýshylar matematıka jáne mehanıka boıynsha halyqaralyq baıqaýda jeńiske jetti

ALMATY. QazAqparat - Almaty qurama komandasy Ó.Joldasbekov atyndaǵy matematıka jáne mehanıka boıynsha XII halyqaralyq ǵylymı jobalar baıqaýynda 4 altyn, 2 kúmis jáne 4 qola medal jeńip aldy, dep habarlaıdy QazAqparat tilshisi.

Almaty qalalyq bilim basqarmasy taratqan málimetke sáıkes, baıqaýǵa Tájikstan, Qyrǵyzstan jáne Qazaqstannan 150-den astam oqýshy qatysty.

Jarys Almatyda 1-3 naýryz aralyǵynda ál-Farabı atyndaǵy Qazaq ulttyq ýnıversıtetiniń mehanıka-matematıka fakýltetiniń bazasynda ótti.

Úmitkerler matematıka, qoldanbaly matematıka, mehanıka jáne ekonomıkadaǵy matematıkalyq ádister syndy birneshe sektsııa boıynsha ǵylymı joba qorǵady. Saıys barysynda oqýshylar jobasyn tanystyryp, ereksheligin aıtty.

«Mektep oqýshylarynyń jeńisine árdaıym qýanamyz. Búgin olar taǵy da júldeli oryndarǵa ıe boldy. Olardy jeńisterimen quttyqtaımyz! Bilim alýǵa degen ynta eshqashan sónbesin. Halyqaralyq baıqaý jyl saıyn ǵylymı-zertteýge qyzyǵýshylyq tanytqan daryndy oqýshylardy anyqtaý úshin ótkiziledi. Osylaısha, naqty ǵylymdy zertteýge yntalandyramyz», – dedi Almaty qalasy bilim basqarmasynyń basshysy Lázzat Jylqybaeva.

Baıqaý qortyndysy boıynsha, №159 gımnazııanyń oqýshylary Abaı Baǵjan, Jóken Dııar jáne № 178 mamandandyrylǵan lıtseıdiń oqýshylary Muqash Ermuhan, Áýbákir Іńkár jeńimpaz atandy.

Al № 178 mamandandyrylǵan lıtseıdiń eki oqýshysy – Jalǵasbek Adal jáne Aıajan Maratova kúmis júldeger atandy.

Úshinshi oryndy №159 gımnazııanyń oqýshylary Erasyl Esengeldın, Nuraly Oralbekov, Janbota Dáýlenhan jáne №39 mamandandyrylǵan lıtseıdiń oqýshysy Oljas Maısyuly ıelendi. №83 gımnazııanyń oqýshysy Aıaýlym Shaıahmet qatysqany úshin gramota aldy.

Aıta keteıik, byltyr 70-ke jýyq almatylyq oqýshy halyqaralyq baıqaýlarǵa qatysyp, 43 oqýshy júldeli orynan kóringen edi.