Almatylyq oqýshylar III toqsanda qalaı oqıdy
ALMATY. QazAqparat - Almaty qalalyq Bilim basqarmasynyń basshysy Lázzat Jylqybaeva onlaın brıfıng barysynda III toqsandaǵy Almaty mektepterdegi oqý formaty týraly aıtty, dep habarlaıdy QazAqparat tilshisi.
«Barshańyzǵa belgili, balalar men muǵalimderdiń densaýlyǵy men qaýipsizdigin saqtaý maqsatynda epıdemıologııalyq jaǵdaıǵa baılanysty qaladaǵy 205 jalpy bilim beretin mektepte oqý jyly qashyqtyqtan bastaldy. Kólsaı men Sulýsaı yqshamaýdandarynda ornalasqan №194 jáne №197, sondaı-aq 35 jekemenshik mektepte adam sanynyń az bolýyna baılanysty oqytý turaqty rejımde júrgizilýde»,- deıdi ol.
Almaty qalasy bas sanıtarlyq dárigeriniń qaýlysyna sáıkes 1- 5-shi synyptarǵa deıin 15 baladan aspaıtyn kezekshi synyptardy ashýǵa ruqsat etilgen.
«Búgingi kúni 1-5 synyptar úshin 150 memlekettik mektepte 17 753 bala kontıngenti bar 1235 kezekshi synyptar bar, 34 jekemenshik mektepte 7 020 bala kontıngenti bar 560 kezekshi synyptar bar»,- deıdi Lázzat Jylqybaeva.
Sonymen qatar, ol kezekshi synypqa sozylmaly aýrýlary joq balalar oqýǵa jiberiletinin aıtty.
«Balalardyń kezekshi synyptarda oqýyn tańdaý quqyǵy balalardyń ata-analaryna nemese zańdy ókilderine tıesili. Kezekshi synyptardyń qyzmeti sanıtarlyq epıdemıologııalyq talaptardy qatań saqtaı otyryp júzege asyrylady. Qalanyń barlyq mektepteri 100% sanıtarlyq qaýipsizdik dezınfektsııalaý quraldarymen qamtamasyz etilgen»,-deıdi spıker.
Lázzat Jylqybaeva 9, 11 (12) synyp oqýshylarynyń aralas oqytý formatyna aýysýy bitirýshi synyptardy qorytyndy attestattaýǵa daıyndaýmen jáne ulttyq biryńǵaı testileý men joǵary oqý oryndary men kolledjderge túsý emtıhandaryn tapsyrýmen negizdelgenin atap ótti.
«Úlgilik oqý josparynyń 70% pánderi sanıtarlyq-epıdemıologııalyq talaptarǵa sáıkes turaqty formatta oqytylatyn bolady al, oqý pánderiniń 30% - qashyqtan oqytylady»,-dedi ol.
