Almatylyq oqýshy Rýbık tekshesin sanaýly mınýtta jınaıtyn robot qurastyrdy
ALMATY. QazAqparat – Almatylyq múmkindigi shekteýli oqýshy Rýbık tekshesin (kýbık-rýbık) sanaýly ýaqytta sanaıtyn robot qurastyryp shyǵardy, dep habarlaıdy QazAqparat tilshisi.
Facebook áleýmettik jelisinde talantty balanyń robotyn tanystyrǵan vıdeo tarady.
Qalyń kópshilik ony qazaqstandyq «Ilon Mask» dep atap júr.
«Bizdiń oqýshynyń talabyna baǵa berseńizder. Kóp adamdar teksheni jınaı almaı júrgende, Serik Hangeldi ony jınaıtyn robot oılap shyǵardy. Serik - mektebimizdiń, elimizdiń maqtanyshy», - dedi № 40 mektep dırektorynyń orynbasary №40 Ermek Erboshaev.
Balanyń ájesiniń aıtýynsha, 3 jasynan bastap Serik modeldeýge áýestene bastaǵan.
«Serik 5 jyl buryn quraǵan robotty Amerıkada 62 jastaǵy ónertapqysh adam qurastyrǵan eken. Keıin onyń eńbegin Reseıde qaıtalady. Al Qazaqstanda birinshi ret Serik jasady. Bul – Seriktiń tórtinshi jumysy. Basqa jumystaryn osy ýaqytqa deıin kóp kórsetken emespiz», - dedi ájesi Aıtgúl Ábdirahmanova.
Densaýlyǵynyń jaǵdaıyna baılanysty Serik Hangeldi úıden oqyp júr.
Qazir ol 9-synypta oqıdy. Bos ýaqytynda shahmat oınap, robototehnıkamen aınalysady.
«Robototehnıka boıynsha arnaıy bilim alǵan joqpyn. Robotty jasaǵanda ınternettegi ınstrýktsııa men programmaǵa qarap otyrdym. Robotty quraýǵa 7 kún ýaqyt ketti. Lego quralǵan robot adamnyń kómeginsiz Rýbık tekshesin jınaıdy»,- dedi Serik Hangeli.
«Qazaqstandyq Ilon Masktyń» jumysyna qytaı kompanııasy qyzyǵýshylyq tanytyp otyr. Balaǵa arnaıy robottehnıka sabaqtaryna onlaın qatysýǵa usynys túsken.
«Saıtqa keshe tirkeldik. Endi Serik qytaılyq ónertapqyshtarmen birge túrli model quraıtyn bolady», -dedi ájesi.
