Almatylyq oqýshy qyz halyqaralyq telearnanyń júrgizýshisi boldy
ALMATY. QazAqparat – Almatylyq oqýshy qyz Elgıza Qarajanova «Fashion TV» halyqaralyq telearnasynda júrgizýshi bolýǵa shaqyrtý aldy, dep habarlaıdy QazAqparat tilshisi.
12 jastaǵy oqýshy qyz telearnada burynnan tanymal. Ol - «Jara» mýzykalyq shoýynyń turaqty qatysýshysy, «Ǵalamshardyń kishkentaı arýy» tıtýlynyń ıegeri.
Málim bolǵandaı, Elgıza «Fashion TV» telearnasynda «Novaıa Volna» belgili mýzykalyq baıqaýynyń aldaǵy maýsymynyń kúndeligin júrgizetin bolady.
«Elgıza 4 aıdan beri «KIDS ART FASHION» baǵdarlamasynda júrgizýshi bolyp tájirıbeden ótip keledi. Osyndaı mańyzdy jobanyń bir bólshegi bolýǵa shaqyrtý alǵanymyzǵa qatty qýanyshtymyz. Bul óte jaýapty joba. Elgıza daıyndalyp jatyr», - dedi anasy Lıýdmıla Dorohova.
Túsirilim jumystary 23 tamyzda bastalady. Birinshi baǵdarlama 28 tamyzda «Fashion TV» efırinen shyǵady.
Elgıza Qarajanova sońǵy festıvalde belgili ánshi Svetlana Lobodamen qosylyp án aıtqan bolatyn. «JaraKIDS» jobasy aıasynda 18 jasqa deıingi eń úzdik oryndaýshy ataǵyn aldy. Munyń aldynda «MýzTV» telearnasynda ıAna Rýdkovskaıamen birge «Balalar ondyǵy» telebaǵdarlamasyn júrgizgen.
