Almatylyq oqýshy Aıvı Lıga ýnıversıtetine shaqyrtý aldy

ALMATY. QazAqparat -Almatydaǵy fızıka-matematıka baǵytyndaǵy Nazarbaev Zııatkerlik mektebiniń 12-synyp oqýshysy Alıma Tuıaqaeva Oksford ýnıversıtetimen qatar álemge áıgili ýnıversıtetterdiń biri Aıvı Lıgasynan Pensılvanııa ýnıversıtetine oqýǵa resmı shaqyrtý aldy, dep habarlaıdy QazAqparat tilshisi.

Mekteptiń baspasóz qyzmeti málim etkendeı, Alıma tolyq qarjylandyrý grantynyń ıegeri retinde v Wharton School of Business mektebinde bıznes jáne marketıng mamandyǵy boıynsha oqýdy josparlap otyr. Bul oqý orny AQSh bıznes mektepteri arasynda keńinen tanymal.

Pensılvanııa ýnıversıtetinde qazaqstandyq oqýshy qyz jetekshi praktıkter men bıznes kóshbasshylarynyń lektsııalaryn tyńdaýǵa, neıromarketıng boıynsha ınnovatsııalyq zertteýlerge qatysýǵa jáne jetekshi kompanııalarda taǵylymdamadan ótýge múmkindik alady. Onyń Ilon Mask pen Ýorren Baffetti qosa alǵanda, kúshti túlekteri bar.

Alımanyń anasy qyzy kishkentaıynan bastamashylyq tanytyp, mekteptiń qoǵamdyq ómirine belsene aralasyp, volonterlikpen de aınalysyp kele jatqanyn aıtty. Ol kóptegen olımpıadalarǵa qatysyp, jeńimpaz atanǵan.

Oqýshy Instagram – daǵy paraqshasynda ata-anasyna, ustazdaryna, dostaryna qoldaý kórsetkeni úshin alǵysyn bildirdi.

«Men bul ýnıversıtetti nelikten tańdaǵanymdy aıtyp bere alamyn. Ol jaqqa barǵym kelgeni sonshalyq, kúndiz-túni oıymnan shyqpaıtyn. Birneshe jyl boıy ýnıversıtetimniń oqýǵa túskenderge jibergen hattaryn oqyp kelemin. Tipti jatqa bilem. Biraq búgingi hattyń mazmuny múlde basqa. «It’s time to celebrate» «Toılaýdyń ýaqyty keldi» degen jazýdy kórip, jylap jiberdim», - dep jazdy Alıma.

Aıta keteıik, Aıvı lıgasy — Amerıka Qurama Shtattarynyń soltústik-shyǵysyndaǵy jeti shtatta ornalasqan segiz jeke amerıkandyq ýnıversıtetterdiń birlestigi. Lıgadaǵy ýnıversıtetter bilim sapasynyń joǵarylyǵymen erekshelenedi.