Almatylyq memqyzmetshilerge rotatsııanyń jańa qaǵıdasy túsindirildi
Vebınar barysynda QR Memlekettik qyzmet isteri agenttiginiń Almaty qalasy boıynsha departamentiniń basshysy Dastan Sekenov saıası qyzmetshilerdi rotatsııalaý ınstıtýtynyń engizilgenin atap ótti. Buǵan deıin rotatsııa tek ákimshilik qyzmetshilerge qoldanǵan bolatyn.
«ıAǵnı, ákimdiktiń basqarma basshylarynyń aımaqaralyq rotatsııasy engizildi (buryn olardy rotatsııalaý bir ákimdiktiń ishinde bolatyn). Alaıda atalǵan rotatsııalaý Agenttiktiń kelisimimen júzege asyrylady, ıaǵnı ákimdikterde komandalyq aýysymdarǵa jol bermeý kózdelgen»,– dedi departament basshysy.
Sonymen qatar, ol belgili bir basshylyq laýazymdardy, onyń ishinde ár túrli memlekettik organdarda jumys istegen «B» korpýsy qyzmetshilerin erikti rotatsııalaý engizilgenin jetkizdi.
«B» korpýsy qyzmetshilerin memlekettik organnyń ishinde aýystyrýǵa múmkindik berildi. ıAǵnı, memlekettik qyzmetshiler memlekettik organnyń ishinde aýysý tártibimen teń laýazymǵa aýysýǵa jáne sol memlekettik organda sońǵy eki jylda tómengi laýazymda jumys ótili bar bolǵan jaǵdaıda joǵarǵy laýazymǵa aýysýyna bolady»,– dedi ol.
Rotatsııanyń negizgi maqsaty – memlekettik organdardyń tıimdiligin arttyrý, sybaılas jemqorlyq quqyq buzýshylyqtardyń aldyn-alý, sondaı-aq qyzmetshilerdiń kásibı áleýeti men basqarýshylyq tájirbıesin damytý jáne tıimdi paıdalaný.
Aıta keteıik, Memleket basshysy 13 qarasha kúni memlekettik qyzmet salasynda qarastyrylǵan keıbir aktilerge ózgerister engizý týraly Jarlyqqa qol qoıdy.
