Almatylyq mektepter aktsııa aıasynda 1,5 tonna qaldyqty qaıta óńdeýge tapsyrdy
ALMATY. QazAqparat - Almatyda qalany kógaldandyrýǵa arnalǵan «Jasyl mektep» aktsııasy óz máresine jetti, dep habarlaıdy QazAqparat tilshisi.
Ótken jyly Almaty ákimdigi EN Social kompanııasymen birlesip «Jasyl mektep» pılottyq jobasyn iske qosqan bolatyn. Ákimdiktiń málimetinshe, atalǵan joba - mektepter ishinde eko-reındjerler tobyn qurýǵa baǵyttalǵan.
«Olar sarapshylardyń tehnıkalyq jáne ádisnamalyq qoldaýymen mektepterde qaldyqtardy bólek jınaýdy júzege asyrdy, bastaýysh synyptarǵa trenıngter ótkizdi, mektepterde zattar men kitaptar almasý boıynsha eko-festıvaldar uıymdastyrdy, qustarǵa jem salǵyshtar jasap, ózderiniń eko-belsendilikterin damytý úshin mektep jedelhattary men ıýtýb arnalaryn qurdy. Jobaǵa barlyǵy 11 mektep: №25 gımnazııa, №46 gımnazııa, HighTech mektebi, № 125 mektep, RFMM, №172 gımnazııa, №185 mektep, №200 gımnazııa, Prestıj mektebi, №76 mektep, №143 mektep-lıtseı qatysty», - delinedi ákimdik habarlamasynda.
Aktsııa qorytyndysy boıynsha qalalyq mektepter qaıta óńdeýge 1,5 tonna qaldyq tapsyrdy.
«Maýsym aıynyń basynda, ıaǵnı, oqý jyly aıaqtalǵan soń, barlyq paıdalanylǵan mektep, jumys dápterlerin, kontýrlyq kartalardy, kúndelikterdi jáne t.b. jınap, olardy qaıta óńdeýge berý josparlanýda. Almaty mektepteri osy jobamen 100% qamtylǵan jaǵdaıda, qalada qaldyqtardy qaıta óńdeýge tapsyrý máselesi sheshiledi, al balalar arqyly turǵyndar arasynda eko-mádenıettiń negizgi qaǵıdattaryn engizýge bolady», - dep habarlady ákimdiktiń baspasóz qyzmeti.
Joba qorytyndysy boıynsha qatysýshylar 29 mamyrda marapattalatyn bolady. Marapattaý rásiminen soń balalar Almaty qoqys suryptaý zaýytyna ekskýrsııaǵa baryp, qaladaǵy qaldyqtardy basqarýdyń barlyq protsesin kóre alady.
