Almatylyq medıtsına uıymdarynyń qyzmetinen 347 mln teńge qaıtaryldy

ALMATY. QazAqparat - Medıtsınalyq saqtandyrý qory 2019 jyldyń on aıynda respýblıka turǵyndaryna kórsetilgen tegin medıtsınalyq kómek sapasyn baqylaý jumystarynyń nátıjesin qorytyndylady, dep habarlaıdy QazAqparat tilshisi.

Monıtorıng nátıjesinde Almaty qalasy boıynsha 347 mln teńgeniń qyzmeti túrli kemshiliktermen kórsetilgeni anyqtaldy. Bul málimetti «Áleýmettik medıtsınalyq saqtandyrý qory» kommertsııalyq emes aktsıonerlik qoǵamynyń Almaty bólimshesi usyndy.

Habarlamaǵa súıensek, kemshiliktiń basym kópshiligin statsıonarlyq jáne statsıonardy almastyratyn kómek uıymdary jibergen. Monıtorıng nátıjesinde olardan 284 mln teńgeden astam qarjy qaıtaryp alynǵan. Konsýltatıvtik-dıagnostıkalyq kómek uıymdary 11,7 mln teńgeniń qyzmetin kórsetýde zańbuzýshylyq jasaǵan. Qalǵan 11,9 mln teńgeden astam aıyppul jedel járdem, qan qyzmeti men patologoanatomııalyq qyzmet sýbektilerine salyndy.

«Kóptegen medıtsınalyq uıymdar emdeý-dıagnostıka barysynda belgilengen standarttardan aýytqý, medıtsınalyq qujattardy durys toltyrmaý, qyzmet baǵasyn negizsiz ósirý syndy olqylyqtarǵa oryn bergen. Sonymen qatar, kórsetildi dep jazylǵan belgili bir qyzmet túrleriniń shyn máninde kórsetilgenin rastaı almaǵan emhanalar da bar», – dedi MSQ Almaty fılıalynyń Medıtsınalyq qyzmet sapasyn baqylaý bólimi basshysy Ásem Manapbaeva.

Onyń aıtýynsha, qazirgi tańda monıtorıng menshik quqyǵyna qaramastan, memlekettik tapsyrys alǵan barlyq medıtsına uıymdarynda júrgiziledi. Jyl basynan beri saraptamanyń úsh deńgeıli úlgisi qoldanysqa engizildi. Naqtyraq aıtqanda, adam ólimi bolǵan jaǵdaıda saraptama emhanalyq-ambýlatorlyq kómek, jedel járdem jáne statsıonar deńgeıinde (syrqattyń em-dom alý úshin júrip ótken marshrýty boıynsha) jasalyp, jiberilgen kemshilikterdiń ózara baılanysy anyqtalady.

Almatyda 178 medıtsına uıymy memlekettik tapsyrys sheńberinde halyqqa tegin kómek kórsetip jatyr. Olarmen bekitilgen kelisimsharttyń jalpy somasy 117,3 mlrd teńgeden asady.