Almatylyq medıtsına uıymdarynda aýdıt júrgizildi

ALMATY. QazAqparat – Almatyda 888,4 myń turǵyn mindetti áleýmettik medıtsınalyq saqtandyrý paketine kiretin qyzmetterdi tegin paıdalana alady. Bul týraly medıtsınalyq saqtandyrý máseleleri jónindegi respýblıkalyq shtab otyrysynda «Áleýmettik medıtsınalyq saqtandyrý qory» KEAQ Almaty fılıaly dırektory Nurlybek Qabdyqaparov aıtty, dep habarlaıdy QazAqparat tilshisi.

«Bıyldan bastap jeńildigi bar 15 sanatqa jatatyn turǵyndarǵa saqtandyrý paketindegi qyzmetter memleket esebinen kórsetiledi. Qazirgi tańda shamamen Almaty turǵyndarynyń 44,7% atalǵan sanatqa kiredi», - dedi Nurlybek Qabdyqaparov.

Fılıal basshysy almatylyqtardy medıtsınalyq saqtandyrý júıesimen tolyqqandy qamtý, barlyq medıtsına uıymdaryndaǵy aqparattyq júıelerdi yqpaldastyrý, árbir turǵynnyń mártebesin anyqtaý máseleleriniń mańyzyn atap ótti. Aıtýynsha, 2018 jyldyń 1 qańtarynda qala boıynsha mártebesi anyqtalmaǵan 246 myń adam bolǵan. Ótken jyldyń sońynda 197 myń adamnyń saqtandyrý júıesindegi mártebesi anyqtaldy.

2020 jylǵa belgilengen jospar boıynsha, 159,2 mlrd teńgeniń qyzmeti satyp alynbaq. Onyń 103,5 mlrd teńgesi – tegin kómek paketine, 55,7 mlrd teńgesi – MÁMS paketine tıesili.

«Bıyl KT/MRT qyzmetterine 3,8 mlrd teńge, onkologııalyq syrqattardy emdeýge 49 mln teńge qarastyrylǵan. Jalpy qala boıynsha 12 KT, 13 MRT apparaty bar», – dedi ol.

Densaýlyq saqtaý vıtse-mınıstri Lázzat Aqtaeva Almaty qalasynyń MÁMS-ke daıyndyq deńgeıi joǵary ekenin atap ótti.

«Búgingi tańda medıtsına mekemelerindegi jumys oryndary kompıýtermen tolyq qamtamasyz etilgen. Memlekettik emhanalar men aýrýhanalar aqparattyq júıelerge qosylǵan. Sondaı-aq, MÁMS şeńberinde qalpyna keltirý, ońaltý, konsýltatıvtik-dıagnostıkalyq kómek pen statsıonardy almastyratyn kómekke bólinetin qarajat ta edáýir artyp otyr», - dedi vıtse-mınıstr.

Aldyn ala berilgen málimetke súıensek, 2020 jyly halyqqa 269 medıtsına uıymy qyzmet kórsetedi. Onyń 131-i — tegin medıtsınalyq kómek paketi, 138-i — saqtandyrý paketi boıynsha jumys isteıdi. Qormen kelisimshart bekitken klınıkalardyń basym bóligi - jeke menshik.