Almatylyq medıtsına uıymdaryna qosymsha 7 mlrd teńge bólindi

ALMATY. QazAqparat – Medıtsınalyq saqtandyrý qory Almaty qalasynyń densaýlyq saqtaý salasyna qosymsha 7 mlrd teńge bóldi. Bul týraly óńirlik kommýnıkatsııalar qyzmetiniń alańynda ótken brıfıngte medıtsınalyq saqtandyrý qorynyń Almaty qalalyq fılıaly dırektory Tileýhan Ábildaev málim etti, dep habarlaıdy QazAqparat tilshisi.

Onyń aıtýynsha, qosymsha qarjy Almatyda mindetti áleýmettik medıtsınalyq saqtandyrý paketindegi qyzmetterdi paıdalaný kórsetkishiniń joǵary bolýyna baılanysty bólinip otyr.

«Jalpy, ońtústik astanada medıtsınalyq qyzmetke júginý kórsetkishi óte joǵary. Sondyqtan qor ótken aptada qaladaǵy medıtsına mekemelerin qarjylandyrýǵa 7 mlrd teńgege jýyq qarjy bóldi. Bólingen aqshanyń 2,8 mlrd teńgesi konsýltatıvtik-dıagnostıkalyq qyzmetterge, 4,1 mlrd teńgesi – statsıonarlyq kómekke, 164,5 mln teńgesi joǵary tehnologııalyq qyzmetterge jumsalmaq», - dedi Tileýhan Ábildaev.

Fılıal basshysynyń dereginshe, bıyl Almaty qalasy densaýlyq saqtaý salasy bıýdjeti 302,4 mlrd teńgege jetti. «Onyń 156,7 mlrd teńgesi – kepildendirilgen tegin medıtsınalyq kómekke, 145,7 mlrd teńgesi MÁMS paketine tıesili. Salystyrar bolsaq, bul ótken jyldyń bıýdjetinen 17% artyq», - dedi ol.