Almatylyq medıtsına uıymdaryna 116,5 mlrd teńge tólendi

ALMATY. QazAqparat – Almatyda jyl basynan beri memlekettik tapsyrys sheńberinde almatylyqtarǵa qyzmet kórsetken medıtsına uıymdaryna 116,5 mlrd teńgeden astam qarjy tólendi. Bul týraly «Áleýmettik medıtsınalyq saqtandyrý qory» KEAQ Almaty fılıaly málimdedi, dep habarlaıdy QazAqparat tilshisi.

Baspasóz qyzmeti taratqan aqparatqa súıensek, atalǵan qarajat kepildendirilgen tegin medıtsınalyq kómek jáne mindetti medıtsınalyq saqtandyrý paketteri sheńberinde kórsetilgen kómek úshin tólengen. Qarjynyń 84,1 mlrd teńgesi – memlekettik tapsyrys negizinde kórsetiletin tegin kómek paketine, 32,4 mlrd teńgesi MÁMS paketine tıesili.

Medıtsınalyq saqtandyrý qory 2018 jyldan beri memlekettik bıýdjetten qarjylandyrylatyn kepildendirilgen tegin medıtsınalyq kómek paketiniń operatory bolyp tabylady. Al, 2020 jyldan bastap Qor mindetti áleýmettik medıtsınalyq saqtandyrý sheńberinde kórsetiletin qyzmetterdiń aqysyn tóleı bastady.

Esterińizge sala ketsek, Almaty qalasy boıynsha 172 medıtsına uıymy Medıtsınalyq saqtandyrý qorymen jumys isteıdi. Onyń jartysyna jýyǵy nemese 55 paıyzy – jeke menshik klınıkalar. Jalpy, 2020 jylǵa tegin kómek paketi sheńberinde bekitilgen kelisimsharttyń jalpy somasy – 141,9 mlrd teńge, MÁMS paketi boıynsha bekitilgen kelisimshart somasy – 51,9 mlrd teńge.