Almatylyq medıtsına mekemelerinen 1 mlrd teńge qaıtaryldy

ALMATY. QazAqparat - Óńirlik kommýnıkatsııalar qyzmetinde ótken brıfıngte medıtsınalyq saqtandyrý qorynyń Almaty qalalyq fılıaly dırektory Tileýhan Ábildaev 2022 jyly qala turǵyndaryna kórsetilgen tegin medıtsınalyq kómek sapasyn baqylaý jumystarynyń nátıjesi týraly aıtty, dep habarlaıdy QazAqparat tilshisi.

Spkerdiń sózinshe, kemshiliktiń basym bóligine bastapqy medıtsınalyq-sanıtarlyq kómek uıymdary jol bergen. Emhanalar kórsetken qyzmetten 93 myń kemshilik anyqtalyp, 117 mln teńge qaıtaryp alyndy.

Sonymen qatar, aqaýmen kórsetilgen 7,7 myń qyzmet – statsıonarlar men statsıonardy almastyratyn kómek uıymdaryna tıesili. Olar atalǵan kemshilikter úshin 880 mln teńge aıyppul tóledi.

«Monıtorıng barysynda anyqtalǵan kemshilikterdiń deni emdeý-dıagnostıka barysynda belgilengen standarttardan aýytqý, medıtsınalyq qujattardy durys toltyrmaý, qyzmet baǵasyn negizsiz ósirý syndy olqylyqtarǵa saıady. Sonymen qatar, «kórsetildi» dep jazylǵan belgili bir qyzmet túrleriniń shyn máninde kórsetilgenin rastaı almaǵan klınıkalar da bar. Almaty fılıalynyń mamandary is júzinde kórsetilmegen qyzmetterdiń 300-den astam jaǵdaıyn anyqtady. Olar 3 mln teigeni keri qaıtardy», - dedi Tileýhan Ábildaev.

Sondaı-aq ol byltyr mindetti áleýmettik medıtsınalyq saqtandyrý esebinen kórsetilgen qyzmetterge 117,3 mlrd teńge jumsalǵanyn atap ótti.