Almatylyq medıtsına mekemelerinen 1,8 mlrd teńge qaıtaryldy

ALMATY. QazAqparat - Medıtsınalyq saqtandyrý qory 2021 jyly Almaty turǵyndaryna kórsetilgen tegin medıtsınalyq kómek sapasyn baqylaý jumystarynyń nátıjesin qorytyndylady, dep habarlaıdy QazAqparat tilshisi.

Monıtorıng nátıjesinde Almaty qalasy boıynsha 75 myń qyzmet túrli kemshiliktermen kórsetilgeni anyqtaldy. Osyǵan baılanysty qaladaǵy emdeý mekemelerine 1,8 mlrd teńge aıyppul salyndy. Bul málimetti «Áleýmettik medıtsınalyq saqtandyrý qory» kommertsııalyq emes aktsıonerlik qoǵamynyń Almaty bólimshesi usyndy.

MSQ Almaty fılıaly dırektory Tileýhan Ábildaevtyń sózine súıensek, kemshiliktiń basym bóligine bastapqy medıtsınalyq-sanıtarlyq kómek uıymdary jol bergen. Emhanalar kórsetken qyzmetten 60 myń kemshilik anyqtalyp, 194,6 mln teńge qaıtaryp alyndy.

Sonymen qatar, aqaýmen kórsetilgen 15 myń qyzmet – statsıonarlar men statsıonardy almastyratyn kómek uıymdaryna tıesili. Olar atalǵan kemshilikter úshin 1,6 mlrd teńge aıyppul tóledi.

«Monıtorıng barysynda anyqtalǵan kemshilikterdiń deni emdeý-dıagnostıka barysynda belgilengen standarttardan aýytqý, medıtsınalyq qujattardy durys toltyrmaý, qyzmet baǵasyn negizsiz ósirý syndy olqylyqtarǵa saıady. Sonymen qatar, «kórsetildi» dep jazylǵan belgili bir qyzmet túrleriniń shyn máninde kórsetilgenin rastaı almaǵan klınıkalar da bar», - dedi Tileýhan Ábildaev.

Esterińizge sala ketsek, Qor sarapshylary halyqqa kórsetilgen qyzmet sapasyn turaqty baqylap otyrady.

Kórsetilgen qyzmet aqysy da jan-jaqty tekserýden keıin tólenedi.

Qaıtaryp alynǵan qarajat medıtsınalyq kómektiń ózge túrlerine jumsalady.