Almatylyq medıtsına qyzmetkerlerine 1,6 mlrd teńge ústemeaqy tólendi
Bastapqy jospar boıynsha onyń 5,5 mıllıard teńgeden astamy koronavırýsqa qarsy kúresip jatqan densaýlyq saqtaý salasy qyzmetkerlerine qosymsha ústemeaqy retinde tólenýi tıis bolatyn.
«Qazirgi tańda ústemeaqyǵa bólingen soma birshama artyp, 6,68 mlrd teńgege jetti. Buǵan aýrýhanalarda ashylǵan qosymsha tósek-oryn sany men koronavırýsqa qarsy kúreske jumyldyrylǵan qyzmetkerlerge tólenetin somanyń artýy túrtki bolyp otyr», - dedi «Áleýmettik medıtsınalyq saqtandyrý qory» KEAQ Almaty qalalyq fılıalynyń dırektory Tileýhan Ábildaev.
Resmı málimetke súıensek, vırýsqa qarsy kúreske qatysyp jatqan medıtsına nysandarynyń tizimin Almaty ákimdigindegi arnaıy komıssııa bekitken. Bekitilgen tizimge sáıkes, naýryz-mamyr aılarynda medıtsına mamandaryna 4,3 mlrd teńgege jýyq qarajat tólendi.
Qaýip deńgeıi asa joǵary 1-topqa – 1,6 mlrd teńge;
Qaýip deńgeıi joǵary 2-topqa – 1,9 mlrd teńgeden astam;
Qaýip deńgeıi ortasha 3-topqa – 689 mln teńgeden astam ústemeaqy berildi.
Fılıal málimetinshe, maýsym aıynda Almaty boıynsha 5441 medıtsına mamany 1,8 mlrd teńgeden astam ústemeaqy alady. Onyń ishinde:
Qaýip deńgeıi asa joǵary 1-toptaǵy 1407 maman – 871,1 mln teńge;
Qaýip deńgeıi joǵary 2-topqa jatatyn 2498 adam – 710,2 mln teńge;
Qaýip deńgeıi ortasha 3-topqa jatatyn 1536 adam – 227,5 mln teńge kóleminde ústemeaqy aldy.
«Qazirgi tańda 1,0 mlrd teńge kóleminde qosymsha ústemaqy tólendi. Onyń 608,8 mln teńgesi jedel járdem qyzmetine tıesili. Sonymen qatar, ınfektsııalyq, provızorlyq jáne karantındik tósek-oryn uıymdastyrylǵan statsıonarlar, emhana qyzmetkerlerine (fıltrler, 4-sanattaǵy jedel járdem shaqyrtýlary, laboranttardan quralǵan mobıldi brıgadalar) 1,2 mlrd teńge tólendi. Jalpy alǵanda, 913 dáriger, 2677 orta býyn medıtsına qyzmetkeri, 980 kishi personal, ózge de 871 qyzmetker (sonyń ishinde jedel járdem qyzmetiniń 803 júrgizýshisi) ústemeaqy aldy», - dedi Tileýhan Ábildaev.
Onyń aıtýynsha, qazirgi tańda qalada epıdemııaǵa qarsy is-sharalarǵa 92 densaýlyq saqtaý nysany jumyldyrylǵan, onyń 74-i – emhana.
Esterińizge sala ketsek, qosymsha tólemder densaýlyq saqtaý salasy qyzmetkeriniń ómirine tóndiretin qaýip deńgeıine qaraı tólenedi.
• Birinshisi – qaýip deńgeıi asa joǵary top. Oǵan ınfektsııalyq statsıonarlar men jansaqtaý bólimderiniń dárigerleri, aǵa jáne orta býyn medıtsına qyzmetkerleri jatady.
• Ekinshisi – qaýip deńgeıi joǵary top. Oǵan provızorlyq statsıonarlarda jumys isteıtin mamandar, jedel medıtsınalyq járdem, sanıtarlyq avıatsııa qyzmetiniń dárigerleri men feldsherleri kiredi.
• Úshinshisi – qaýip deńgeıi ortasha top. Oǵan karantındik statsıonarlardyń dárigerleri, orta jáne kishi medıtsına qyzmetkerleri, sanıtarlyq dárigerler (memlekettik qyzmetkerler), jedel járdem kóliginiń júrgizýshileri jatady.
