Almatylyq medıtsına qyzmetkerleri 13,8 mlrd teńge kóleminde qosymsha aqy aldy
ALMATY. QazAqparat - Medıtsınalyq saqtandyrý qory tarapynan koronavırýs pen pnevmonııaǵa qarsy kúreske 159 mlrd teńgeden astam qarjy qarastyrylǵan. Almaty boıynsha bul baǵytta 22,7 mlrd teńge bólindi, dep habarlaıdy QazAqparat tilshisi.
«Medıtsınalyq saqtandyrý qory» AQ Almaty qalalyq fılıalynyń aqparatyna sáıkes, Qazaqstanda koronavırýs pen vırýsty pnevmonııaǵa shaldyqqan azamattarǵa medıtsınalyq kómek saqtandyrylǵan ne saqtandyrylmaǵanyna qaramastan kórsetiledi. Sondaı-aq, COVID-19 juqtyrǵan jáne indet belgileri tabylǵan patsıentterge mobıldi brıgadalar men úı jaǵdaıyndaǵy statsıonar qyzmeti qarastyrylǵan.
«Almatyda naýryz ben qazan aılary aralyǵynda koronavırýs indeti boıynsha kórsetilgen medıtsınalyq kómekke 5,7 mlrd teńge bólindi. Onyń 1,3 mlrd teńgesi PTR-testke jumsalǵan», - dedi fılıal dırektory Tileýhan Ábildaev.
Sondaı-aq, naýryz ben qazan aılary aralyǵynda epıdemııaǵa qarsy is-sharalarǵa jumyldyrylǵan medıtsına uıymdary qyzmetkerlerine Almaty qalasy boıynsha 13,8 mlrd teńge qarastyrylǵan. Onyń ishinde:
1-qaýip tobyna - 6 mlrd 455,9 mln teńge (11 373 adam), 1 qyzmetkerge orta eseppen aıyna – 567 650 teńge;
2-topqa – 5 mlrd 533,6 mln teńge (17 972 dam), 1 qyzmetkerge orta eseppen aıyna – 307 903 teńge;
3-topqa – 1 mlrd 866,5 mln teńge (12 433 adam), 1 qyzmetkerge orta eseppen aıyna – 150 122 teńge.
Búgingi tańda Almaty fılıaly boıynsha qosymsha tólemder tolyq tólengen.
