Almatylyq maman ekologııa talaptaryn buzǵan kásipkerden para suraǵan

NUR-SULTAN. QazAqparat – Almaty qalasynda «Medeý» memlekettik óńirlik tabıǵı parki» KMM mamany kásipkerden para talap etti dep aıyptaldy, dep habarlaıdy QazAqparat.

Bul týraly QR Sybaılas jemqorlyqqa qarsy is-qımyl agenttigi 1-shi departamentiniń asa mańyzdy ister jónindegi tergeýshisi Danııar Bıgaıdarov aıtyp berdi.

«Almaty qalasynyń Sybaılas jemqorlyqqa qarsy is-qımyl departamenti Almaty qalasy jasyl ekonomıka basqarmasyna qarasty «Medeý» memlekettik óńirlik tabıǵı parki» KMM qorshaǵan ortany qorǵaý jáne ekologııa bóliminiń Naýryzbaı aýdandyq bólimshesiniń basshysyn ustady. Ol ekologııalyq normalardy saqtamaǵan jeke kásipkerden ákimshilik jaýapkershilikke tartpaý úshin 180 000 teńge somasynda aqsha talap etken», - dedi D. Bıgaıdarov Facebook paraqshasynda ótken onlaın brıfıngte.

Spıkerdiń aıtýynsha, tergeý jumystary jalǵasyp jatyr. Kúdiktige qatysty túpkilikti sheshimdi sot shyǵarady.