Almatylyq qutqarýshylar turǵyndarǵa taýǵa shyqpaýǵa jáne aǵashtardyń túbine kólik qoımaýǵa keńes berdi
ALMATY. QazAqparat – Kishi Almaty jáne Úlken Almaty basseınderinde qar kóshkini júrýi múmkin. Almaty qalalyq Tótenshe jaǵdaılar departamenti turǵyndarǵa qar kóshkinin týdyrmas úshin qar basyp qalǵan taý bókterlerine shyqpaýǵa keńes berdi, dep habarlaıdy QazAqparat tilshisi.
«Qazgıdromet» taratqan eskertý negizinde Almatynyń Tótenshe jaǵdaılar qyzmeti qardyń kóp túsýi jáne taý bókterindegi qar jamylǵysynyń turaqsyz bolýyna baılanysty Kishi Almaty men Úlken Almaty ózenderiniń basseınderinde 17-18 aqpan kúnderi qar kóshkini bolýy múmkin ekenin eskertedi! Sondaı-aq, taýǵa shyqpaýǵa jáne kólikterdi aǵashtardyń túbine qoımaýǵa keńes beredi», - delingen Almaty qalalyq TJD taratqan habarlamada.
Esterińizge salaıyq, 16 aqpan kúni Almatyǵa mol qar túsip, aǵashtardyń butaǵy synyp, ondaǵan kólikti basyp qalǵan bolatyn.
