Almatylyq qutqarýshylar taýda qan qysymy kóterilgen týrıstke kómek kórsetti
ALMATY. QazAqparat - Respýblıkalyq jedel-qutqarý jasaǵynyń qutqarýshylary taýda júrip aýyryp qalǵan týrıstke kómek kórsetti, dep habarlaıdy QazAqparat tilshisi.
«Keshe 2021 jyldyń 11 sáýir kúni tústen keıin respýblıkalyq jedel-qutqarý jasaǵynyń kezekshi bólimine Almaty-Arasan shıpajaıy aýdanynda týrıst qyzdyń densaýlyǵynyń nasharlaı bastaǵany týraly habarlama kelip tústi. Qyzdyń basy aýryp, qusqan. Habarlama onyń tanysynan kelip tústi, oqıǵa ornynan geolokatsııalyq derekter de jiberildi. Ótinish berýshiniń aıtýynsha, qyz oryndyqta otyrýǵa qalǵan, al qalǵan týrıster marshrýtyn jalǵastyrdy»,- dep habarlady QR TJM Respýblıkalyq jedel-qutqarý jasaǵynyń baspasóz qyzmeti.
Osy habarlamany alǵannan keıin RJQJ jedel toby dereý izdestirý-qutqarý jumystaryna shyqty. Alynǵan geolokatsııalyq derekter ótinish berýshi sıpattaǵan jerge sáıkes kelmedi. Top jetekshisi alynǵan koordınattardy ustanýǵa sheshim qabyldady.
«Qyzdy teńiz deńgeıinen 2200 metr bıiktikte Prohodnoe shatqalynan tapty. Týrıst qyz arqasyn aǵashqa súıep otyrdy. Qutqarýshy dáriger zardap shekken adamnyń qan qysymyn ólshedi, ol aıtarlyqtaı joǵarylaǵany belgili boldy. Alǵashqy kómek kórsetilgennen keıin RJQJ qutqarýshylary qyzdy tómen qaraı túsirip ony Apattar medıtsınasy ortalyǵynyń qyzmetkerlerine tapsyrdy»,- dep atap ótti vedomstvadaǵylar.
