Almatylyq qutqarýshylar taýda adasyp ketken 8 adamdy qutqardy
ALMATY. QazAqparat - Almatyda qutqarýshylar taýda adasyp ketken 8 adamdy qutqardy, dep habarlaıdy QazAqparat tilshisi.
QR ІІM TJK respýblıkalyq jedel qutqarý jasaǵy ótken demalysta eki qutqarý operatsııasyn júrgizdi.
«Jeksenbi kúni keshki 18:38-de týrıster toby taýdan óz betinshe túse almaı jatqany týraly shuǵyl habarlama tústi. Bes adamnyń biri bala eken. Saıahatshylar Úlken Almaty kóline Aleshkın kópiri arqyly oń jaq qaptalmen kóterilgen. Ózen boıymen shamamen 1,5 saǵattaı júrip otyryp, shekara postynyń tusynan shyqqan. Kólikterin ǵarysh stansasynyń qasynda qaldyrǵan. Jaǵdaıdy kezekshi pýltine adasqandardyń biri habarlasyp aıtty», - dedi baspasóz qyzmetinen.
Oqıǵa ornyna attanǵan 5 jasaq sarbazy adasqandardy birden taýyp aldy. Olardyń eshqaısysyna medıtsınalyq kómek qajet bolǵan joq.
Sol kúni Jedel qutqarý jasaǵy Kókjaılaý shatqalynda adasyp ketken taǵy 3 áıeldi qutqardy.
«Jaıaý shyqqan áıelder qaıtar joldy taba almaı qalǵan. 5 mınýtta oqıǵa ornyna shyqqan qutqarýshylar ıtpen iz kesý arqyly adasqan áıelderdi taýyp aldy. Qutqarýshylar olardy mashınaǵa deıin din aman jetkizdi. Olardyń biri aıaǵyn qaıyryp alǵan eken. Jaraqat alǵan áıelge medıtsınalyq kómek kórsetildi», - dedi RJQJ qutqarýshylary.
Qutqarýshylar taýǵa shyqqanda barynsha abaı bolýdy eskertedi.
«Jaqyndaryńyzǵa marshrýtyńyzdy habarlap ketińiz. Sonymen qatar, ózińizben birge GPS-navıgatory bar baılanys quralyn ala júrgen jón. Osy eki jaǵdaıda da týrıster habarlasý múmkindiginiń arqasynda aman qaldy», - dedi Respýblıkalyq jedel qutqarý jasaǵynyń mamandary.
