Almatylyq qutqarýshylar balalardy qaraýsyz qaldyrmaýǵa shaqyrady

ALMATY. QazAqparat - Almaty qalasy Tótenshe jaǵdaılar departamenti basshysynyń orynbasary Samat Asaınov onlaın brıfıng barysynda jaz maýsymynda órttiń aldyn alý sebepteri men ádisteri týraly aıtty, dep habarlaıdy QazAqparat tilshisi.

Onyń aıtýynsha, bıyl turǵyn úı sektorynda jıi órt bolǵan.

«Kóbine otty abaısyz paıdalaný jáne balalardyń tentektigi órttiń shyǵýna ákeledi. Ata-anasynyń qaraýynsyz qalǵan balalar órttiń bolýyna sebepker bolýda, oǵan mysaldar jetkilikti», - dedi Samat Asaınov.

Sonymen qatar, ol 17 mamyrda saǵat 22.00 shamasynda tirkelgen rezonanstyq órttiń sebebin aıtty. Ol kezde órt úsh qabatty kóppáterli úıdiń barlyq shatyryn qamtydy. Tekserý barysynda órttiń sebebi balalardyń tentektiginen ekeni anyqtaldy. Abyroı bolǵanda, órt aýyzdyqtaldy, eshkim zardap shekken joq.

Spıker kishkentaı balalardyń terezeden qulap ketý jaǵdaılarynda tilge tıek etti.

«Birneshe sekýndqa ǵana úlkenderdiń qaraýynsyz qalǵan sábı terezeden qulaýy, jaraqat alýy, tipti qaıtys bolýy ábden múmkin. Munyń sebebi – úlkenderdiń jaýapsyzdyǵy!»,- dedi Tótenshe jaǵdaılar departamentiniń ókili.

Samat Asaınov balalardy nazardan tys qaldyrmaýǵa, terezelerge blokıratorlar, torlar ornatýǵa, moskıt torlaryna senbeýge, jıhazdy balanyń tereze jaqtaýyna shyǵa almaıtyndaı etip alys ornalastyrýǵa keńes berdi.

Qazirgi kezde TJD qyzmetkerleri kópqabatty úılerdiń aýlalaryn aralap, turǵyndarǵa jadynamalar taratyp jatyr.

Qutqarýshylarǵa Jas Otan jastar qanatynyń jáne QR Qyzyl Jartyaı qoǵamynyń eriktileri kómektesýde.