Almatylyq qutqarýshylar aptap ystyq basylǵansha úıden shyqpaýǵa keńes berdi

ALMATY. QazAqparat – Almaty qalalyq tótenshe jaǵdaılar departamenti aptap ystyqqa baılanysty almatylyqtarǵa eskertý jasady, dep habarlaıdy QazAqparat tilshisi.

Qazgıdromettiń málimetinshe, 19 shilde kúni aýa temperatýrasy 42 gradýsqa deıin ysıdy.

Osyǵan oraı Almaty qalasynyń tótenshe jaǵdaılar departamenti qala turǵyndary men qonaqtaryn taýda órt qaýipsizdigi erejesin saqtaýǵa jáne dalaǵa kóp shyqpaýǵa keńes berdi.

Sondaı-aq vedomstvo ókilderi tómendegi qaýipsizdik sharalaryn saqtaýdy usynady:

- Taýǵa demalýǵa barǵan jaǵdaıda tutanǵan temeki qaldyqtaryn tastamańyz;

- Bir jelige birneshe elektr qurylǵy qospańyz, óıtkeni elektr jelisiniń shamadan tys júktelýi qysqa tuıyqtalýǵa jáne órtke ákelýi múmkin.

- Balalardy avtokólik ishine az ýaqytqa bolsa da qaldyrmańyz. Qatty ystyqtan bala esinen tanyp qalýy múmkin.

- Qala turǵyndary men qonaqtaryn kún sáýlesiniń áserinen saqtaný úshin serýenge shyqpaýǵa shaqyramyz.

«Órt qaýipti kezeńde Almaty qalasy TJD aldyn alý sharalaryn kúsheıtti. Taýly ormandy jerlerde órttiń aldyn alý maqsatynda bekitilgen patrýldeý kestesine sáıkes demalys jáne mereke kúnderi orman sharýashylyǵy mekemeleri men jergilikti polıtsııa ókilderi birlesken reıd ótkizedi»,- dep atap ótti departamentten.