Almatylyq kommýnıster kedeıshilikpen kúres týraly zań qabyldaýdy usyndy
ALMATY. QazAqparat - Almatylyq kommýnıster kedeıshilikpen kúres týraly máseleni kóterdi. Bastamany sarapshylar qoǵamdastyǵy da qoldap otyr, dep habarlaıdy QazAqparat tilshisi.
Jıynǵa Eńbek, áleýmettik qorǵaý jáne kóshi-qon komıtetiniń Almaty qalasy boıynsha departamenti jáne qalalyq áleýmettik ál-aýqat basqarmasynyń ókilderi qatysty.
«Bizge kedeıshilikpen kúres týraly zań shyǵaryp, qabyldaýymyz kerek. Pandemııa osy máseleni qolǵa alý kerektigin kórsetti. Aldymen, eń tómengi jalaqyny kóterý kerek. Qazir biz adamdardyń eńbekaqysy turǵyn úıdi jaldaýǵa ketetinin kórip otyrmyz. Qazir kóptegen adamdar otbasyn asyraý úshin úlken qalalarǵa keledi. Sebebi aýyldy jerlerde jumys joq. Jaqsy ómir súrý úshin adamdarǵa jaǵdaı jasaý qajet. Máselen, Qytaıda kedeıshilikke qarsy zań bar. Bizde joq», - deıdi Qazaqstan kommýnıstik halyq partııasynyń múshesi Gúldana Nurpeıisova.
QKHP Naýryzbaı aýdanynyń hatshysy Aqbopa Ábilqasymovanyń aıtýynsha, qazir adamdar tamaq pen dári-dármek satyp alý úshin nesıe alýǵa májbúr.
«Pandemııa kezeńi qazaqstandyqtardyń ómirine úlken áser etti. Kóbisi jumyssyz qaldy. Sol ýaqytta adamdar azyq-túlik satyp alý úshin nesıe ala bastady. Meniń oıymsha, álemniń kez-kelgen jerinde mundaı nárse joq. Qazir bárimizdiń jalaqymyz negizinen tamaqqa, jalǵa alǵan páter men kommýnaldyq qyzmetterdiń tólemderin tóleýge ketedi. Sonymen qatar, dári-dármekter bar, adamdar damýy kerek. Olar balalary baratyn túrli úıirmelerdiń aqshasyn tóleýi kerek. Sondyqtan, memleket kedeıshilikpen kúresý úshin júıeli sharalar qabyldaýy tıis. Biz Qazaqstanda kedeıshilik bar ekenin moıyndaýymyz kerek. Bizge kedeıshilik shegin retteıtin arnaıy baǵdarlama qajet. Eń tómengi jalaqyny kem degende eki esege kóterý qajet. Bizdiń depýtattar nesıelik raqymshylyq jasaý týraly máseleni únemi kóterip otyrady, óıtkeni turǵyndardyń basym bóliginde nesıe bar. Meniń oıymsha, ásirese, kópbalaly otbasylarǵa qoldaýdy kúsheıtip, ana kapıtalyn engizý qajet. Balalar - bizdiń bolashaǵymyz. Osy balalardy memleket esebinen ana kapıtaly esebinen úımen qamtamasyz eteıik «, - dedi spıker.
Óz kezeginde, halyqaralyq aqparattyq tehnologııalar ýnıversıtetiniń oqytýshysy, PhD doktory Dáýren Asqarov teńge ekvıvalentin damytyp, dollar baǵamynan bas tartýdy usyndy.
