Almatylyq kólik júrgizýshilerine eskertý jarııalandy
ALMATY. QazAqparat – Almatyda qarashanyń besi kúni jaýyn jaýyp, arty qarǵa ulasady, dep habarlaıdy QazAqparat tilshisi.
Sınoptıkterdiń boljamy boıynsha, Almatyda 4 qarashadan 5 qarashaǵa qaraǵan túni qar aralas jańbyr jaýyp, 6 qarashanyń birinshi jartysyna deıin úzilissiz jalǵasady. 5 qarashada aýa temperatýrasy shamamen 0 gradýs bolyp, kúndiz 5-ten 7-ge deıin jylynady. 5-6 qarashada túnde synap baǵanasy -1 deıin tómendeıdi, al kúndiz 2-4 gradýs jyly bolady.
Almaty kóshelerinde kók taıǵaq bolýy yqtımal. Ásirese, ál-Farabı dańǵylynan joǵary aýmaqtaǵy joldarda kólik júrgizýshiler men jaıaý júrginshilerge saq bolý eskertildi.
«Trotýarlarda, ál-Farabı dańǵylynyń joǵary bóligindegi joldarda kóktaıǵaq bolýy múmkin. Sondyqtan júrgizýshiler kóligine qysqy dońǵalaǵyn salyp alǵany jón. Barlyq qaýipsizdik sharalaryn saqtaýdy suraımyz» delingen ákimdik habarlamasynda.
