Almatylyq klınıkalar 7,5 mlrd teńgege konsýltatıvti-dıagnostıkalyq qyzmet kórsetti

ALMATY. QazAqparat – Bıylǵy jyldyń 11 aıynda almatylyq klınıkalar halyqqa 7,5 mlrd teńgege KT/MRT syndy konsýltatıvtik-dıagnostıkalyq kómek túrlerin kórsetti. Bul týraly onlaın brıfıng barysynda «Áleýmettik medıtsınalyq saqtandyrý qory» KEAQ Almaty fılıaly dırektory Tileýhan Ábildaev aıtty, dep habarlaıdy QazAqparat tilshisi.

Onyń aıtýynsha, qor Almaty turǵyndaryna saqtandyrý paketi sheńberinde kórsetilgen qyzmetterge 43,6 mlrd teńge tóledi. Halyqqa kórsetilgen qyzmet aqysy onyń sapasy men kólemi tolyq tekserilgennen keıin aýdarylady. Shyn máninde kórsetilgen, emdeýge qoıylatyn talaptar men hattama tártibi saqtalǵan qyzmetter úshin ǵana aqy tólenedi.

«Máselen, MÁMS iske qosylǵaly beri buryn azamattar qaltasynan tólep kelgen baǵasy qymbat qyzmetter qoljetimdi bola bastady. Ótken 11 aıda saqtandyrý paketi sheńberinde kórsetilgen KT/MRT, PTR syndy taǵy basqa qyzmetter sany 2019 jylmen salystyrǵanda 3 ese artty. 11 aıda Almaty qalasy boıynsha kórsetilgen konsýltatıvtik-dıagnostıkalyq qyzmetterge 7,5 mlrd teńgeden astam qarjy tólendi», - dedi fılıal basshysy.

Shyǵynnyń basym bóligi – 23 mlrd teńgeden astamy statsıonarlyq medıtsınalyq kómekke tıesili. Taǵy 6,8 mlrd teńge joǵary tehnologııalardyń kómegimen jasalatyn medıtsınalyq qyzmetterge, 2,6 mlrd teńge statsıonardy almastyratyn kómekke, 305,7 mln teńge profılaktıkalyq tekserýlerge jumsalǵan.

«Sonymen qatar, bıyl reabılıtatsııalyuq qyzmet túrlerin kórsetetin klınıkalar sany 69-ǵa jetti. ıAǵnı, MÁMS júıesi buryn jekelegen sanattarǵa ǵana tegin kórsetilip, kóbine azamattardyń qaltasynan tólenip kelgen medıtsınalyq qyzmetterdi qoljetimdi etti», - dep qorytty Tileýhan Ábildaev.