Almatylyq kelinshektiń garajǵa tyǵyp qoıǵan 164 myń AQSh dollaryn jumysshy urlap ketti
ALMATY. QazAqparat - Almaty turǵyny úıine tyǵyp qoıǵan 164 myń AQSh dollarynan aırylyp qaldy, dep habarlaıdy QazAqparat tilshisi.
Qalalyq polıtsııa departamentiniń baspasóz qyzmeti habarlaǵandaı, 34 jastaǵy kelinshek úıi men jerin satyp, odan túsken 164 myń AQSh dollaryn garajǵa tyǵyp qoıǵan.
«Biraq ol monshanyń qurylysyn bastaǵanda jasyryp qoıǵan aqshasyn alýdy umytqan. Kúnderdiń kúninde qurylysshy jumyskerlerdiń biri telefonyn óshirip, jumysqa kelmeı qoıǵan. Ol qasyndaǵy áriptesine 100 000 teńge bergen de, qaıtaryp jibergen. Osy kezde úı ıesiniń kóńiline kúdik uıalaıdy. Tyǵyp qoıǵan aqshasy ornynda joq bolyp shyqty. Úı ıesi birden polıtsııaǵa habarlasqan. Tergeý toby 35 jastaǵy Qyrǵyz azamatyn birden tapty. Ol Almatynyń ortasynda páter jaldap turyp jatqan jerinen ustaldy. 164 myń AQSh dollarynyń jartysy urynyń qolynda bolyp shyqty. Qalǵan jartysyn ol Almaty oblysynda ár jerge tyǵyp úlgergen. Aqsha ıesine qaıtaryldy. Keı bóligin Qyrǵyzstanǵa anasyna jibergen. Qazir bul aqparat tekserilip jatyr. Ustalǵan adam ýaqytsha oqshaýlaý ornyna qamaldy», - dedi qalalyq polıtsııa departamentiniń basqarma basshysy Esen Ysqaqov.
