Almatylyq kásiporyn jolaqyny ózine alatyn júrgizýshilermen qalaı kúresedi
ALMATY. QazAqparat - «AlmatyElektroTrans» kásiporny qaladaǵy qoǵamdyq kólik salasyn damytý jaıly josparlarymen bólisti, dep habarlaıdy QazAqparat tilshisi.
«Búginde bizdiń avtoparkte 587 qoǵamdyq kólik bar. Biz keler jyly qosymsha 200 avtobýs satyp alýdy josparlap otyrmyz. Atap aıtqanda 12 metrlik 100 avtobýs, 18 metrlik 100 avtobýs alynady. Bul kólikterdiń barlyǵy gazben júretin bolady», - dedi «Almatylektrotrans» JShS paıdalaný qyzmetiniń dırektory Nurlan Elshibaev.
Sonymen qatar, ol avtopark júrgizýshileriniń jalaqysy 250-270 myń teńge ekenin aıtty. Qyzmetkerler eki kún jumys istep, eki kún demalady.
«Bizde jospar joq. Basqa tasymaldaýshylardan ereksheligimiz sol. Bizdiń júrgizýshiler «báıgege «qatyspaıdy. Olarǵa jarysýǵa eshqandaı sebep joq. Eger olar jol erejesin buzsa, kamera arqyly kórip otyramyz. Biz vıdeony polıtsııaǵa jiberemiz, ary qaraı quqyq qorǵaýshylar júrgizýshilerge aıyppul salady, olar tıisti jazasyn alady», - dedi ol.
Onyń aıtýynsha, eger júrgizýshiler jol erejesin buzsa, qaıta oqytýdan ótkiziledi.
Nurlan Elshibaev jolaqydan túsken qarjyny qaltalaryna salyp otyratyn júrgizýshilermen qalaı kúreskenderin de aıtty.
«Júrgizýshiler qoldaryna aqsha almaýy úshin basqa júıe qurdyq. Satylǵan bıletterdiń sanynan syıaqy beretin boldyq. Bul qor barlyq júrgizýshiler arasynda jumys istegen saǵat sanyna qaraı bólinetin bolady. Eger bunyń aldynda júrgizýshi 500 teńge qaltasyna salyp alyp, bılet bermegen bolsa, endi oǵan bulaı etýdiń qajeti joq», - dedi Nurlan Elshibaev.
