Almatylyq kásipkerlerge úndeý jarııalandy
ALMATY. QazAqparat – Almaty qalasy kásipkerler palatasynyń dırektory Narıman Ábilshaıyqov álemde epıdemııalyq ahýaldyń nasharlaýyna baılanysty almatylyq kásipkerlerdi sanıtarlyq talaptardy saqtaýdy kúsheıtýge shaqyrady, dep habarlaıdy QazAqparat tilshisi.
«Qazir bizdiń aldymyzdy óte mańyzdy másele tur – bul pandemııanyń ekinshi tolqynynyń bastalýy. Biz Batys Eýropanyń, tutastaı alǵanda kóptegen elderdiń osy qubylyspen tap bolǵan jaǵdaıdy kórip otyrmyz. Qazaqstandaǵy, onyń ishinde Almatydaǵy statıstıkaǵa sáıkes, koronavırýs ınfektsııasynyń statıstıkasy turaqty», – dedi Narıman Ábilshaıyqov.
Sonymen qatar, ol koronavırýs ınfektsııasynyń jaǵdaıynyń turaqtylyǵyna qaramastan, aldyn alý sharalaryn saqtaýǵa tıisti nazar aýdarý óte mańyzdy ekenin atap ótti.
«Barlyq qarapaıym erejelerdi saqtaý mańyzdy (áleýmettik qashyqtyq, maska rejımi jáne t. b.). Osylaısha, biz karantın sharalaryn engizýdi keıinge shegerýimiz múmkin. Osy sharalardy saqtaı otyryp, kásipkerler óz qyzmetin odan ári jalǵastyra alady. Pandemııanyń ekinshi tolqyny bastalǵan kezde kásiporyndardy tolyq karantınge jabý múmkindigi de joqqa shyǵarylmaıdy. Osyǵan baılanysty men kásipkerlerdi saqtyq sharalaryn saqtaýǵa shaqyramyn», – dedi ol.
