Almatylyq kásipkerlerdi qoldaý maqsatynda 55 joba qarjylandyryldy
ALMATY. QazAqparat – Almaty kásipkerlerin qoldaý aıasynda 94 mlrd teńgege 55 joba qarjylandyryldy. Bul týraly Almaty qalasy kásipkerler palatasynyń dırektory Narıman Ábilshaıyqov onlaın bırfıng barysynda aıtty, dep habarlaıdy QazAqparat tilshisi.
Narıman Ábilshaıyqovtyń aıtýynsha, Memleket basshysy ekonomıkanyń zardap shekken sektorlaryndaǵy shaǵyn jáne orta bıznesti 6 paıyzǵa deıingi memlekettik sýbsıdııamen qamtamasyz etýdi tapsyrǵan. Onyń qataryna saýda-sattyq, kólik tasymaly, týrızm, qoǵamdyq tamaqtaný oryndary, kınoteatrlar jáne qonaq úı kásibi bar.
«Sýbsıdııa tótenshe jaǵdaı jarııalanǵan kún - 16 naýryzdan bastap 12 aıdy qamtıdy. Osy turǵyda Almaty qalasynda kásipkerlikti qoldaý aıasynda «Qarapaıym zattar ekonomıkasy» baǵdarlamasy iske asyrylyp jatyr. Osy jyldyń 22 qyrkúıegindegi jaǵdaı boıynsha, 94 mlrd teńgege 55 joba qarjylandyryldy. Sonymen qatar, otandyq bıznesti qoldaý aıasynda Almaty ákimdiginiń tapsyrmasymen óńirlik «Atameken» palatasymen birlese otyryp, arnaıy portaldy iske qostyq. Oǵan qaladaǵy ár óndirýshi kompanııa óz derekterin engize alady», – dedi ol.
Sonymen qatar, Narıman Ábilshaıyqov «Eńbek» memlekettik baǵdarlamasy aıasynda «Bastaý-bıznes» jobasy iske asyrylyp jatqanyn atap ótti.
«Jobanyń negizgi maqsaty – kásipkerlik negizderin oqytý. Onyń aıaqtaǵan soń tyńdaýshylarǵa bıznesin damytýǵa 200 AEK kóleminde grant berilip otyr. Búginde Almaty qalasynda maýsym aıynan bastap bul jobany 2 287 tyńdaýshy aıaqtady. 2020 jyl boıynsha Almaty qalasyna 1 705 grant bólingen. 327 tyńdaýshy qazir kásibin bastady»,-dedi spıker.
