Almatylyq kásipkerler vaktsına naýqanyn arttyrýǵa kómektesip jatyr – basqarma basshysy
ALMATY. QazAqparat - Almaty qalasy qoǵamdyq densaýlyq basqarmasynyń basshysy Narıman Tabynbaev megapolıste 316 407 adam vaktsına alǵanyn málim etti, dep habarlaıdy QazAqparat tilshisi.
Qalanyń bas dárigeriniń aıtýynsha, kásipkerler turǵyndardy vaktsına alýǵa shaqyryp, túrli aktsııalar men utys oıyndaryn uıymdastyryp jatyr.
«Bizde vaktsına shtaby jumys isteıdi, onyń quramynda kásipkerler de bar. Shaǵyn jáne orta bıznes ókilderi vaktsına alý bıznesti qalpyna keltirýge múmkindik beretinin aıtty. Ótken jyldyń jazynda SOSO jumys istemegeni esimizde. Búginde qabyldanǵan sharalardyń arqasynda qaıtadan ashyldy, saýda ortalyqtary men bazarlar da egý pýnktteri bar. Kásipkerler vaktsına naýqanyn arttyrýǵa kómektesip jatyr», – dedi Narıman Tabynbaev.
Onyń aıtýynsha, bul bıznestiń, qoǵam men memlekettiń qalypty ómir saltyna degen umtylysy. Almatyda Naýryzbaı jáne Alataý aýdandary halyqqa vaktsına salý boıynsha kóshbastap tur.
Óz kezeginde Almatynyń bas sanıtarlyq dárigeri Jandarbek Bekshın halyqty vaktsınaǵa yntalandyrý halyqaralyq tájirıbe ekenin aıtty.
«Izraıl men AQSh-ta utys oıyndary uıymdastyrldy. Olar mıllıon dollarǵa deıin utystar ótkizdi. 17 el halyqty vaktsınaǵa yntalandyrý úshin osyndaı sharalardy ótkizdi. Bizde skýter, turmystyq tehnıka, iPhone oınatyldy. Meniń oıymsha, bul durys, óıtkeni vaktsına alý qalypty ómirge oralýdyń jalǵyz joly. Árıne, antıvakserler ony unatpaıdy. Munda túsindirý jumystary da, ekonomıkalyq yntalandyrý da bolýy kerek. Bul naýqan oń nátıje beredi», – dep qosty Jandarbek Bekshın.
