Almatylyq kásipkerler tirkeýden ótýge úlgermeı jatyr
QR Bas sanıtarlyq dárigerdiń 2020 jylǵy 14 tamyzdaǵy №47 qaýlysyna sáıkes jumysty bastaýǵa ruqsat alý úshin kásipkerlik sýbektilerdiń barlyǵyna elektrondy tsıfrlyq qoltańba arqyly www.infokazakhstan.kz saıtynan tirkeýden ótý qajet.
Kásipkerlerdiń portalǵa kóptep kirýi men elektrondyq tsıfrlyq qoltańbany alý kezindegi qıyndyqtar saldarynan kásipkerler ýaqytynda ótinim berýge úlgermeı jatyr.
«Eger ruqsat etilgen qyzmet túrin júzege asyratyn kásipker infokazakhstan.kz portalynda tirkeýsiz jumys jasasa, onda ákimshilik jaýapkershilikke tartylmaıdy. Sonymen birge ol belgilengen sanıtarlyq talaptardy saqtaýǵa mindetti. Eger monıtorıngilik top kásipkerlerdiń portalda tirkeýsiz jumys jasaıtyndyǵyn anyqtasa,SES organdary infokazakhstan.kz portalynda tirkelý qajettiligi týraly tıisti uıǵarym shyǵarady», - deıdi «Atameken» kásipkerler palatasynyń dırektory Narıman Ábilshaıyqov.
Sonymen qatar, ol talapty oryndamaǵan jaǵdaıda ákimishilik jaýapkershilik qarastyrylǵanyn eske saldy.
«Jeke tulǵalarǵa salynatyn aıyppul 5 aılyq eseptik kórsetkish, laýazymdy tulǵalar úshin 15 AEK, shaǵyn bıznes nemese kommertsııalyq emes uıymdar úshin 100 AEK. Orta bıznes úshin - 200 AEK, iri bıznes úshin - 500 AEK»,– dep tolyqtyrdy spıker.