Almatylyq kásipkerler ǵasyr derti boıynsha tegin tekserýden ótip jatyr
ALMATY. QazAqparat - Almatyda arnaıy aktsııa aıasynda kásipkerler men bıznes qurylym jetekshileri ǵasyr dertinen tegin tekserilip jatyr, dep habarlaıdy QazAqparat tilshisi.
Immýnıtet tapshylyǵynyń vırýsy (ITV) tekserý aktsııasy Almatynyń JITS ortalyǵynda ótip jatyr. Tekserilýge barǵan kásiporyn, mekeme qyzmetkerleri men basshylaryna dertten qorǵaný joldary túsindirilip, dárigerler indettiń bızneske keri yqpaly joq ekenin aıtyp berdi.
«Aktsııaǵa «Alataý jaryq» kompanııasynyń 130 qyzmetkeri men basshylyq qyzmettegi adamdary qatysty, sondaı-aq qaladaǵy ózge de tehnıka salasyndaǵy kásiporyn qyzmetkerleri kelýde. Aldaǵy naýryz aıynda Dúnıejúzilik ekonomıkalyq forýmnyń bıznes qurylymdar arasynda jyl saıynǵy saýalnamasy júrgiziledi. Onda anketa túrinde ITV-nyń bızneske yqpaly týraly suraqtar qoıylady. Saýalnama qorytyndysy boıynsha, qazaqstandyqtar arasynda ITV-nyń qanshalyqty túsindirilgeni anyqtalady», - dedi Almaty qalasy boıynsha JITS-pen kúres jáne aldyn alý ortalyǵynyń bas dárigeri Marat Túkeev.
Aktsııa aıasyndaǵy tekserilý 15 mınýt ishinde júrgizilip, nátıjesi birden anyqtalady. Tekserilýshi týraly aqparat qupııa saqtalyp, tek ózine ǵana aıtylady.
