Almatylyq kásipkerler 5% mólsherlememen nesıe ala alady

ALMATY. QazAqparat -Almaty qalalalyq Kásipkerlik jáne ınvestıtsııalar basqarmasynyń basshysy Erkebulan Orazalın onlaın brıfıng barysynda kásipkerlikti qoldaý baǵdarlamalarynyń júzege asýy týraly aıtty, dep habarlaıdy QazAqparat tilshisi.

Basqarma basyshysynyń aıtýynsha, Almaty ákimi Baqytjan Saǵyntaevtyń tapsyrmasy boıynsha qalada Almaty Business – 2025 óńirlik baǵdarlamasy aıasynda shaǵyn jáne orta bıznesti qoldaý sharalar júzege asrylyp jatyr.

«Almaty qalasynyń Naýryzbaı, Alataý, Túrksib jáne Jetisý aýdandarynyń turǵyndary kásipkerlikti júrgizý úshin jyldyq 5% mólsherlememen nesıe ala alady. Aıta ketsek, elimizde bul mólsherleme 6%-dy quraıdy», – dedi Erkebulan Orazalın.

Baǵdarlamaǵa Almaty qalasynda tirkelgen jáne qyzmetin júzege asyratyn shaǵyn jáne orta kásipkerlik sýbektileri qatysa alady. Bir qaryz alýshyǵa joǵarǵy soma 180 mln teńge. Nomınaldy syıaqy mólsherlemesi belsendi emes aýdandar úshin 5%, belsendi aýdandar úshin 7% quraıdy.

Qazirgi kezde baǵdarlamanyń seriktes bankteri – «Sberbank», «VTB bank». Olarda kásipkerlikti qoldaý úshin qarajat bar. Jumysty «Alfa Bank» pen «Forte Bank» arqyly bastaý josparlanýda. Búginde 3,3 mlrd teńge kóleminde 46 jobaǵa qoldaý kórsetildi, jalpy bıýdjet 11 mlrd teńgeden asady.

Erkebulan Orazalınniń aıtýynsha, Almaty Business – 2025 baǵdarlamasy kásipkerler arasynda keńinen tanymal ári megapolıste kásipkerlikti damytýda oń nátıje kórsetti.

«Shaǵyn jáne orta bıznesti yntalandyrý úshin Almaty ÁKK bazasynda Almaty Finance uıymdary jáne «Almaty» mıktro qarjy uıymdary quryldy. Qaryzdar jyldyq 6% ben 2% mólsherleme boıynsha 7 jylǵa deıingi merzimge beriledi. Búginde 9,5 mlrd teńge kóleminde 130 joba qarjylandyryldy. Berilgen nesıelerdiń 30%-dan astamy start-up jobalarǵa tıesili», – dedi spıker.

Sonymen qatar, Erkebulan Orazalın kepildigi joq jańa kásipkerler de nesıe alatynyn aıtty.

Ol úshin baǵdarlamaǵa nesıe tarıhy bar klıentter úshin jyldyq 12% mólsherlememen 6 mln teńgege deıin, sondaı-aq nesıe tarıhy joq kásipkerler úshin 1 mln teńgege deıin kepilsiz nesıe berý múmkindigi engizildi. Nesıe merzimi 24 aıǵa deıin.

Sondaı-aq Almaty Business-2025 baǵdarlamasy aıasynda kásipkerler satyp alynatyn jabdyqty kepilge qoıyp qarjylandyrý úshin Almaty Finance pen «Almaty» ShQU júgine alady.