Almatylyq kásipkerdi bopsalaǵan qylmyskerler qolǵa tústi
ALMATY. 28 jeltoqsan. QazAqparat /Erbol Azanbek/ - Ótken demalys kúni almatylyq kásipkerdi bopsalap, qorqytý arqyly 50 myń dollar talap etken qylmyskerler qolǵa tústi. Bul týraly qalalyq ІІD-niń baspasóz qyzmeti habarlady.
Jambyl oblysynan kelgen tórt qaraqshy kásipkerge «qamqorshy» bolýdy usynǵan. Bul bolmaǵan jaǵdaıda onyń januıasyna qastandyq jasaıtyndaryn aıtyp, kúsh kórsetken.
«Kásipker basynda olardyń talabyna qulaqasýdy jón kórgen. Artynan bul oıynan aınyp, polıtsııaǵa habarlasqan. Barlyq aıǵaqtardy jınaǵan soń, qylmyskerlerdi ótken demalys kúnderi ustaý operatsııasy júzege asyryldy. Olar jábirlenýshiden 10 myń dollar alyp jatqan jerinen Tóle bı-ıAssaýı kósheleriniń qıylysynda quryqtaldy», - deıdi Almaty qalalyq ІІD Uıymdasqan qylmyspen kúres basqarmasynyń bastyǵy Valerıı Kozlov.
Onyń aıtýynsha, ustalǵandar buryn birneshe ret sottalǵan. Jambyl oblysynan Almatyǵa birneshe aı buryn kelgen olar ártúrli jolmen tabys taýyp kelgen.
«Qazir olardyń Almatyda bolǵan ýaqyttarynda nemen aınalysqanyn tekserip jatyrmyz. Basqa da qylmystarǵa qatysy bolýy da múmkin. Tekserý barysynda bulardyń 30 jastaǵy bireýi 5 jyl buryn adam óltirgeni úshin halyqaralyq izdestirýde júrgendigi anyqtaldy. Ustalǵandar qamaýǵa alynyp, bopsalaý isi boıynsha qylmystyq is qozǵaldy», - deıdi polkovnık Kozlov.
