Almatylyq kásipker úıin sý basqan oqýshyǵa úsh bólmeli páter syılady
AQTÓBE. QazAqparat - Almatylyq kásipker Qaırat Qudaıbergen baspanasy sýda qalyp, kamera aldynda jylaǵan aqtóbelik oqýshy Mahabbat Eshimovaǵa úsh bólmeli páter syılady, dep habarlaıdy QazAqparat tilshisi.
Aqtóbe qalasyndaǵy sý tasqyny kezinde baspanasynan aıyrylyp, «kitaptarym sýda qaldy» dep jylaǵan Mahabbat Eshimova úshin búgin qýanyshty kún. Kásipker Qaırat Qudaıbergen onyń otbasyna úsh bólmeli páterdi syılady.
«Biz óte qýanyshtymyz. Kásipker bizge Batys aýdanynan úsh bólmeli páter syılady. Aldaǵy eki aptada jóndeý jumystaryn júrgizip, qajetti turmystyq tehnıkany alyp beremiz dep ýáde etti. Qýanyshymyzda shek joq. Biz úshin alańdap, tilek aıtqan barsha adamǵa alǵysymyzdy aıtamyz. Úısiz júrgender baspanaly bolsyn!»,- dedi Turǵangúl Eshimova.
Búgin Qaırat Qudaıbergen Aqtóbege kelip, Eshimovter otbasyna jańa páterin kórsetti. Ol ózi jasaǵan syıdy barlyq kásipkerlerge úlgi etip, qazaqstandyqtardy baspanasyz qalǵan otbasylarǵa kómektesýge shaqyrdy.
Bul beınematerıal Qaırat Qubaıbergenniń áleýmettik jelidegi paraqshasynda bar. Al Mahabbat Eshimova ózin Mahambet aýylynan alyp shyǵyp, jańa úı syılaǵan aǵasyna alǵys jetkizdi. Ol «ózińiz qartaısańyz da, júregińiz qartaımasyn» degen tilegin aıtty.
Aıta keteıik, keshe ǵana Qaırat Qudaıbergenniń aqtóbelik oqýshyǵa baspana alyp beretini sóz bolǵan edi. Qalalyq ákimdik ol unatqan úıdiń ózen jaǵasynda ekenin eskertip, saıajaı statýsyn ózgertýgekelisim bermegen.
