Almatylyq kásipker plastıkalyq bótelkelerden turmystyq zattar jasaıdy

NUR-SULTAN. QazAqparat – Almaty oblysynyń turǵyny Jánibek Seıitov plastıkalyq bótelkelerden turmysqa qajetti zattar jasap shyǵarady. Ol bul kásip túrin ınternetten óz betimen úırengen. Búginde kásipkerdiń turaqty tutynýshylary da bar. Osy oraıda qorshaǵan ortany plastıkalyq qaldyqtardan tazartyp qana qoımaı, ony paıdaǵa jaratyp jatqan jas ónertapqyshpen QazAqparat tilshisi kishigirim suhbat qurǵan edi.

Jánibek Seıitov Almaty oblysy Qaratal aýdany Úshtóbe qalasynyń turǵyny. Buǵan deıin taksıst bolǵan, bıyldan bastap jańa kásipti meńgerdi.

«Bul isti osy jyly qysta qolǵa aldym. Buǵan deıin plastıkalyq bótelkelerden túrli zattardy jasaýdy ınternetten kórip, sodan qyzyǵýshylyq týyndady. Basynda bir zat jasap kórdim, keıin aqyryndap kóbeıte bastadym. Plastıkalyq bótelkelerden jasalǵan zattardy kórgen tanystarym, kórshilerim meni qoldaı bastady. Sosyn aqyryndap jasaǵan dúnıelerimdi Instagram, Tik-Tok, YouToube jelilerine jarııa ettim. Ol jerde de qyzyǵýshylyq tanytyp, jyly pikir qaldyrǵandar kóp boldy», - dedi Jánibek Seıitov

Ónertapqysh ázirge plastıkalyq bótelkelerden sypyrǵy men jip jasaıdy. Dese de aldaǵy ýaqytta basqa da zattar jasaý oıy bar.

«Jip jasaý ońaıyraq, tez bolady. Al sypyrǵy daıyndaý ýaqyt alady. Jalpy kúnine 4-5 sypyrǵyǵa deıin daıyndaı alamyn. Onyń ústine jipke qaraǵanda sypyrǵyǵa suranys basym bolyp tur. Bir sypyrǵyny 2 myń teńgege satyp jatyrmyn, al jip 200 teńge turady. Keıbir tutynýshylar 2 myń teńgeniń sypyrǵysyn qymbatsynyp jatady. Bul jerde másele paıdanyń astynda qalý emes, plastıkalyq bótelkeden sypyrǵy jasaý tehnologııasy qıyndaý jáne ol eńbek pen ýaqytty talap etedi. Tıisinshe baǵa da joǵarylaý. Plastıkalyq bótelkelerdi ózim izdep tabamyn. Kópqabatty úılerdiń qoqys konteınerleriniń janynda plastıkalyq bótelkelerge arnalǵan bólek jáshik bar, sol jerden jınap alamyn», - deıdi ol.

Úshqala turǵynynyń shaǵyn kásipkerlikti qolǵa alǵanyn estigen jergilikti ákimdik pen «Atameken» ulttyq kásipkerler palatasynyń ókilderi kásipkerge bıznestiń qyr-syryn úırene túsý úshin biliktiligin arttyrý kýrsynan ótýdi usynypty.

«Kelesi jyldyń basynda iskerlikti oqyp alýdy usyndy. Negizi buǵan deıin «Bıznes bastaý» baǵdarlamasy boıynsha oqyǵam, biraq emtıhannan óte almaı qaldym. Endi sony qaıtadan meńgerý múmkindigi týyp tur. Eger oqý sátimen bolsa 500 myń teńgeniń bıznes grantyn utyp alýǵa da bolady. Plastıkalyq bótelkelerden zattar jasaýǵa qatysty ıdeıa tolyp jatyr, biraq bári aınalyp kelip qarjyǵa tireledi. Sebebi ol úshin zamanaýı qurylǵy kerek, qazir neshetúrli stanoktar bar», - dedi jas kásipker.

Onyń aıtýynsha, atalǵan kásipti «maǵan da úıretshi» dep nıet tanytyp jatqandar bar eken.

«Bolashaqta armanym, osy plastıkalyq bótelkelerden zattar jasaý kásibimdi ulǵaıtyp, iri kásiporyn ashqym keledi. Qazir ne kóp, plastıkalyq qaldyq kóp, shıkizat jaǵynan problema joq. Sol sııaqty aldaǵy ýaqytta sypyrǵy men jipten basqa da zattar jasap shyǵarýdy josparlap otyrmyn», - deıdi ónertapqysh.